تاند ( چهارشنبه د مرغومي – جدي ۲۴مه) رویټرز خبري اژانس په یوه راپور کې د امریکا د ولسمشر ډونالډ ټرمپ له قوله لیکلي ، که د ایران حکومت لاریون کوونکي اعدام کړي، نو دوی به «ډېر سخت او جدي اقدام» ترسره کړي.
ټرمپ دا څرګندونې د سي بي اس خبري شبکې سره په مرکه کې کړې دي.
هغه ویلي چې،تر اوسه یې د لاریون کوونکو د اعدام په اړه رسمي راپور نه دی ترلاسه کړی، خو خبرداری یې ورکړ چې که دا کار وشي، د امریکا غبرګون به سخت وي.
رویترز لیکي، ټرمپ تر دې مخکې د خپلې ټولنیزې شبکې «تروث سوشیل » له لارې یو پیغام خپور کړی و چې پکې یې له لاریونوالو غوښتي وو دولتي ادارې تر خپل واک لاندې راولي او د هغو کسانو نومونه ثبت کړي چې د ده په وینا، د خلکو په وژنو او ځورونو کې لاس لري.
ټرمپ دغه راز ویلي چې هغه د ایران له چارواکو سره ټولې لیدنې لغوه کړې دي او دا به تر هغه وخته دوام ولري چې د لاریون کوونکو پر وړاندې روان تاوتریخوالی او وژنې ودرول شي.
ټرمپ دا وژنې «بېمانا» بللې دي.
د رویترز د راپور له مخې، ټرمپ د خپل پیغام په پای کې د «MIGA» اصطلاح کارولې، چې د انګلیسي ژبې د یوې سیاسي جملې لنډیز دی او مانا یې «ایران ته بېرته عظمت ور وبښو» ده.
دا په داسې حال کې ده چې ولسمشر ټرمپ یوه ورځ وړاندې ویلي وو، د ایران چارواکو له امریکا سره د نویو خبرو اترو لپاره چمتووالی ښودلی ،خو زیاتوي چې روان تاوتریخوالی او د لاریونوالو پر وړاندې سخت چلند، د هر ډول سیاسي او ډیپلوماټیک تعامل پر وړاندې جدي خنډ بلل کېږي.
ایران کې وروستیو لاریونونو حکومتي چارواکي اړ کړل چې، د مخنیوي لپاره یې د اعدام د سزا خبره وکړي.
د وروستیو مالوماتو له مخې په دغه هېواد کې د لاریونوالو د وژل کېدو شمېرې تر ۲۵۰۰ اوښتې دي خو لاهم دا شمېرې وروستۍ نه دی.