تاند ( چهارشنبه د مرغومي – جدي ۱۷مه) د هند او بنګله دېش ترمنځ د ناندریو پر دوام تازه د کرکټ نړیوالې شورا د بنګله دېش وړاندیز رد کړ.
یادې شورا بنګله دېش ته په جدي ډول ویلي چې، که هند ته د ۲۰۲۶ نړیوال جام لوبو لپاره سفر ونکړي نو د لوبو پواینټونه به یې مقابلو لوبډلو ته ورکړي.
ای سي سي ویلي: « بنګله دېش به یا هند ته سفر کوي او هلته به د ۲۰۲۶ میلادي کال شل اوریز نړیوال جام لپاره په اعلان شوي مهالوېش لوبه کوي او که داسې نه وي، نو ستاسو پواینټونه به مخالفو لوبډلو ته ورکړل شي.»
د بنګله دېش کرکټ بورډ بیا هغه راپورونه رد کړي چې، ګواکې ورته د کرکټ نړیوالې شورا ویلي، چې یا دې هند ته ولاړ شي او یا دې نړیوال جام کې نه لوبېږي.
هند د آی پي اېل له لوبو څخه د بنګله دېش لوبغاړی مستفیظ الرحمن وویست، خو بنګله دېش یې په مقابل کې له بي پي اېل څخه هندۍ پرزنټره وویسته او په دغه هېواد کې یې د آی پي اېل لوبو پر نشر بندیز ولګوه او ورسره یې د کرکټ نړیوالې شورا څخه وغوښتل څو د دوی لوبې له هنده بل هېواد ته ولېږدوي.
د کرکټ نړیوالې شورا یې وړاندیز رد او ترڅنګ هندۍ پرزنټرې رېدماپتک هم هغه تورونه رد کړل چې ګواکې دا د بي پي اېل له لوبو شړل شوې ده.
هغې ویلي، چې په خپله یې له بنګله دېش سره تړون ختم کړ او زیاته کړې یې ده، چې ورته خپل هېواد لومړیتوب لري.
د دغو ناندریو پر دوام د هند اس جي سپورټس کمپنۍ هم له لېټن داس او نورو بنګله دېشي لوبغاړو سره د مالي ملاتړ قراردادونه پای ته ورسول.