تاند ( سه شنبه د مرغومي – جدي ۱۶مه)  د بنګله دېش او هند ترمنځ د کرکټ په وروستۍ کړکېچ کې بنګله دېش له بي پي اېل څخه هندۍ پرزېنټره ریدماپټک وشړله.

بنګله دیشي رسنۍ وایي، چې د بنګله‌دېش کرکټ بورډ BCB د سه‌شنبې په ورځ دغه پرېکړه کړې ده.

هندۍ رسنۍ وایي چې سږني  BPL لپاره د وړاندې کوونکو نوې ډله معرفې شوې وه، چې پکې د پاکستان زینب عباس او د هند ریدماپټک هم شامل وو.
د تبصره‌کوونکو په ډله کې د پاکستان پخوانی لوبډلمشر او د PCB پخوانی مشر رمیز راجا او د انګلستان د کرکټ نومیالی ستوری ډېرن ګاف شامل وو.

خو د بنګله‌دېش او هند ترمنځ د وروستیو سیاسي ترینګلتیاوو وروسته، په BPL کې د ریدما ګډون پای ته ورسېد.

دا ګام وروسته له هغه واخیستل شو چې د کولکته نایټ رایډرز لوبډلې د جنورۍ په ۳مه نېټه، د (BCCI) د لارښوونو وروسته، مستفیظ الرحمن د آی‌پي‌اېل له سکواډه لرې کړ.

په غبرګون کې، د بنګله‌دېش کرکټ بورډ (BCB) بېړنۍ غونډه وکړه او د امنیتي اندېښنو له امله یې د کرکټ نړیوالې شورا (ICC) ته خبر ورکړ چې، ښايي بنګله‌دېش ونه شي کولی د راتلونکي شل اوریز نړیوال جام لپاره هند ته سفر وکړي.

بورډ همدارنګه غوښتنه کړې ده چې د بنګله‌دېش د نړیوال جام سیالۍ دې له هنده بهر لوبغالو ته ولېږدول شي.

بنګله دېش دغه راز د جنورۍ په ۵مه نېټه، په دغه هېواد کې د  آی‌پي‌اېل پر خپرېدو هم بندیز ولګوه.