تاند( سه شنبه د مرغومي ـ جدي ۱۷مه) ‏د اطلاعاتو او کلتور وزارت په کندهار کې د اوسني افغانستان د بنسټ‌اېښودونکي او امپراطور احمد شاه بابا تاريخي کور د بيارغونې چارې بشپړې کړې.

د طالبانو د ياد وزارت د مسوولانو په وینا، د یادې ودانۍ د بيارغونې چارې د ۱۷.۵ ميليونه افغانيو په لګښت د دوو کلونو په موده کې بشپړې شوې.

د نظر خاوندان وایي، چې د دې پروژې بشپړېدل د کلتوري او تاريخي ميراثونو د خونديتوب په برخه کې مهم ګام دی.

مسوولان وايي، د احمد شاه بابا په کور کې یې د ګرځندویانو له پاره یو موزیم، تفریحي سیمه، د وسایطو تم ځای او ګڼې نورې اسانتیاوي هم برابرې کړې دي.

کندهار مېشتي هم دا یو ښه ګام بولي او وایي چې، په دې سره به کندهار ته د کورنیو او بهرنیو ګرځندویانو راتګ نور هم زیات شي.

احمد خان ابدالي د کندهار له سدوزیو څخه ؤ، ده په ۱۷۲۲ ز کال پۀ هرات ولایت کې دې نړۍ ته سترګې وغړولې.

تاریخ لیکي چې، وروسته له ۶۰۰ کلونو د پخواني خراسان پر کڼدوالو د افغانستان منځته را تلل او د يرغلګرو خوارزمشاهیانو، مغولانو، تيموريانو، د هند بابريانو، تيموريانو، ايراني صفويانو او پۀ ځانګړې توګه د نادر افشار هغه ظلمونه چې د خلکو لۀ سرونو څخه يې منارونه جوړول پۀ هر ځای کې و. هر ملي او با احساسه کس دې ته اړ کوي تر څو دې ستر انسان (احمد شاه بابا) ته د درناوي سر ټيټ او لۀ هغه څخه مننه وکړي، چې مونږ ته يې د افغانستان پۀ نامۀ هېواد پۀ ميراث پرېښود.