تاند (سې شنبه، د مرغومي/ جدې ۹ مه) په کراچۍ کې پولیس وايي چې د يکشنبې په ورځ د دې ښار په سهرابګوټ مېنه کې د يوې افغانې ښځې او د هغې د درې ماشومانو جسدونه «په دار ځړول شوي حالت» کې د هغوی په کور کې موندل شوي دي۔
د پوليسو په وینا، د دې کورنۍ د څلورو غړو د مړينې کره علت به د عدلي طب د معايناتو او نورو شواهدو تر څېړلو وروسته معلوم شي.
خو «ډان» ورځپاڼې د پوليسو له قوله ليکلي چې ښايي دغه ښځه د «احساسي يا عاطفي اختلال» ښکار وه او داسې ښکاري چې «د کورنيو ستونزو له امله يې خپل واړه ماشومان وژلي او بيا يې ځان وژلی وي.»
پوليسو د قربانيانو پېژندنه داسې کړې ده: فاطمه (۳۵ کلنه)، سونم (۱۰ کلنه)، آرزو (۳ کلنه) او ارمان (۲ کلن)۔
نجيبالله، چې د فاطمې مېړه دی او اصلاً د پنجاب اوسېدونکی دی او د سهرابګوټ په سيمه کې د سبزۍ په بازار کې کار کوي، پوليسو ته ويلي چې د يکشنبې په سهار شاوخوا څلور بجې د کار لپاره له کوره ووت، خو کله چې بېرته راستون شو نو خپله مېرمن او درې ماشومان يې ځړول شوي وموندل۔
د پوليسو په وينا، فاطمه د نجيبالله دوهمه مېرمن وه، او هغه له خپلې لومړۍ مېرمنې يوه لور لرله چې نوم يې سونم و۔
پوليس ګومان کوي چې دې ښځې د خپل ژوند له پای ته رسولو مخکې خپلې دوې لوڼې او يو زوی وژلي دي، خو بيا هم پوليس وايي چې د مړينې کره لامل به د عدلي طب له معايناتو وروسته روښانه شي۔
د پوليسو په وينا، تر اوسه د پېښې په ځای کې د شخړې هېڅ نښه نه ده موندل شوې، او ګاونډيانو هم پوليسو ته ويلي چې دوی د کومې لانجې يا جګړې غږ نه دی اورېدلی۔
د سهرابګوټ د پوليسو مرستيال، اورنګزېب خټک، ډان ورځپاټې ته وويل چې د راپورونو له مخې دې ښځې به کله ناکله خپل ماشومان وهل، او مېړه به يې هم کله ناکله د غوسې په حالت کې ګواښ کاوه چې که له دې کاره لاس وانخلي، نو بله ښځه به وکړي.
د سند ايالت د کورنيو چارو وزير، ضياءالحسن لنجر، له پوليسو غوښتي چې د دې پېښې په اړه بېړنۍ، بېطرفه او شفافه پلټنه وکړي۔ خو د سند د کورنيو چارو د وزير په اعلاميه کې، دا پېښه د لومړنيو څېړنو پر بنسټ «ځانوژنه» بلل شوې ده۔