تاند (دوشنبه د مرغومي ـ جدي ۸مه) د بدخشان په کشم ولسوالۍ کې د طالبانو د حکومت ولسوال حیات الله محسن وايي چې، د سرو زرو د یوه کان نړېدلو پېښه کې درې کان کیندونکي مړه شوي دي.
محسن ویلي چې، دغه پېښه نن (دوشنبه) غرمه شاوخوا ۱۲ بجې رامنځ ته شوې ده.
نوموړي د پېښې په تړاو نور څه نه دي ویلي.
افغانستان کې د کانونو د نړېدو دا پېښه لومړنۍ نه، بلکې وخت ناوخته داسې پېښې د کان کيندونکو ژوند اخلي چې، لوی لامل یې غیرمسلکي کان کېندنه بلل کېږي.
اخوا بیا د یوه بل خبر له مخې، د جوزجان امنیه قومندانۍ ویلي چې، د دغه ولایت په اقچه ولسوالۍ کې نامعلومه وسله والو کسانو یو زرګر وژلی دی.
د یادې قومندانۍ ویاند عبدالستار حلیمي زیاته کړې چې، د نصیراحمد په نوم یاد زرګر درې ورځې وړاندې ویشتل شوی او وژل شوی دی.
د حلیمي په وینا، تر اوسه د دې پېښې لامل نه دی معلوم او په اړه یې پلټنې روانې دي.
طالب جان د خلکو په غم کې نه ده هسي د خلکو په وینو روپۍ جوړوي 😭 کانونه یې هم د بې مسلکه اشرارو خلکو په لاس ورکړي مقصد دوی دولت ګټي او غریب خلک د کمې تنخوا لپاره زوند د لاسه ورکوي 😔