تاند ( دوشنبه د مرغومي ـ جدي ۸مه) د طالبانو د بهرنیو چارو وزارت دویم سیاسي رییس، ذاکر جلالي ویلي چې امریکا سره یې اړیکې داسې پړاو ته رسېدلي چې د رغېدا او پراختیا برخه کې هېڅ جدي خنډ نه لیدل کېږي.
نوموړي ویلي طالبانو ته د افغانستان سپارلو لپاره د دوحې تړون ښيي چې، په دواړو غاړو کې د پام وړ کچې “عمل” شته او غواړي په واقعي تګلارو اړیکې پراخې کړي.
دغه طالب چارواکي دا څرګندونې کابل ته د افغانستان سولې لپاره د امریکا د پخواني ځانګړي استازي، زلمي خلیلزاد د تېرې ورځې د سفر غبرګون کې کړې دی.
جلالي وايي دا ریښتیا ده چې په تېرو شلو کلونو کې د افغانستان او امریکا اړیکو استثنا لرله، خو له دې ور اخوا ورسره طالبان اړیکو کې کومه پېچلتیا نه لري.
تېره ورځ زلمي خلیلزاد سره د طالبانو بهرنیو چارو وزیر، امیرخان متقي هم وویل چې امریکا سره تعامل عملاً نوي پړاو ته داخل شوی دی.