تاند ( دوشنبه د مرغومي – جدي ۸مه) روسیې په روان کال کې افغانستان ته د مایع پټرولیم ګازو صادرات د پام وړ زیات کړي دي.
له همدې امله افغانستان د سیمې په کچه د روسیې د ګازو تر ټولو ستر پېرېدونکی شمېرل شوی دی.
د رویټرز خبري آژانس د راپور له مخې، د روان کال د جنورۍ څخه تر نومبر پورې افغانستان ته د روسیې د مایع ګازو صادرات شاوخوا یو نیم برابره زیات شوي او نږدې ۴۱۸ زره مټریک ټنو ته رسېدلي دي.
دغه ګاز تر ډېره د موټرو د سون توکو، د کورونو د تودوخې او ځینو صنعتي اړتیاوو لپاره کارول کېږي.
د رویټرز راپور د اقتصادي شنونکو له قوله لیکلي چې، افغانستان ته د روسیې د ګازو د وارداتو زیاتوالی د هېواد د انرژۍ په بازار کې د نسبي ثبات سبب شوی او د خلکو پر ورځني ژوند یې مثبت اغېز کړی دی.
روسیه داسې مهال افغانستان او منځنۍ اسیا ته د ګازو صادرات لوړوي چې، دغو هېوادونو ته د ایران د ګازو پر صادراتو نړیوالو بندیزنو سیوری غوړولی او دغه برخه کې یې چارې ټکنۍ شوې دي.
د مالوماتو له مخې اوس افغانستان او د منځنۍ اسیا هېوادونه د روسیې د ټول مایع ګازو صادراتو شاوخوا ۳۶ سلنه جوړوي چې. تېر کال دا کچه یوازې ۱۹ سلنه وه. دا بدلون د افغانستان لپاره د انرژۍ په برخه کې د بدیلو لارو پرانیستل او د سیمهییزو اقتصادي اړیکو پیاوړتیا څرګندوي.