تاند (دوشنبه، د مرغوميږ جدې ۸ مه) د پاکستان د پوځ، ملېشو او پوليسو په کرک کې د دولت د وسله والو مخالفانو پر ضد پرون (یکشنبې پراخ عملیات وکړل.
پاکستاني رسنیو د خپلو امنیتي ځواکونو د ادعا پر اساس وویل چې په دې ګډو عملياتو کې ۸ وسله وال مخالفان، چې دوی ترهګر بللي دي، وژل شوي دي.
همداراز ادعا شوې چې د عملیاتو په لړ کې د وسله والو مخالفانو ګڼ پټنځايونه ويجاړ شول او يو امنيتي سرتېری ټپي شو۔
د کواټ آر پي او عباس مجيد مروت تصديق وکړ چې دا عملیات د بهادرخېل په سيمه کې شوی، چې پکې مهمه بريا ترلاسه شوې ده۔
هغه وويل چې د ترهګرو له منځه وړل د سيمې د امن د ټينګښت هڅې لا پياوړې کړې دي۔
د عملياتو پر مهال امنيتي ځواکونو مسلکي تګلاره خپله کړه او په سيمه کې موجود خطرناک عناصر يې په برياليتوب سره له منځه يووړل۔
پاکستاني رسنیو د امنیتي چارواکو په قول دې ته اشاره نه ده کړې چې دا بریدونه د کومې ډلې خلاف شوي دي.
راپورونه وايي چې د خیبرپښتونخوا ګڼې سیمې اوس عملاًٍ د ټي ټي پي تر کنټرول لاندې دي او د دې سیمې وضعیت تر ډېره د افغانستان د جمهوري حکومت د مهال له وروستیو کلونو سره وته والی لري.