تاند (یکشنبه، د مرغومي/ جدې ۷ مه) د فرانس پریس خبري اژانس د راپور له مخې، د دغه هیواد نامتو سینمايي لوبغاړې«بریژیت باردو بنست» د یکشنبې په ورځ، د جدې په اوومه،د ۹۱ کلونو په عمر مړه شوه.
د بریژیت باردو بنسټ، (Brigitte Bardot) چې دا یې په خپله بنسټګره او مشره وه، د دې د مړینې خبر په یوه بیان کې اعلان کړ.
په بیان کې ویل شوي چې بریژیت باردو، چې په نړیواله کچه د یوې نامتو لوبغاړې او سندرغاړې په توګه پېژندل کېده، وروسته له هغه چې د سینما له نړۍ سره یې د تل لپاره مخه ښه وکړه، خپل ټول ژوند او انرژي د حیواناتو د حقونو دفاع او د همدې بنسټ فعالیتونو ته ځانګړې کړه. د هغې د مړینې دقیق وخت او ځای نه دي اعلان شوی.
بریژیت باردو په ۱۹۵۶ کال کې د «…او خدای ښځه پیدا کړه» (And God Created Woman) په نوم فلم نړیوال شهرت ته ورسوله او د ۱۹۵۰ او ۱۹۶۰ لسیزو په ترڅ کې د فرانسې په کلتوري او جنسي سمبولونو بدله شوه. هغې په شاوخوا ۵۰ سینمايي فلمونو کې کار کړی او د هنرمنانو، روڼاندو او آن موسیقارانو د څو نسلونو لپاره الهامبخښونکې شوه.
د «…او خدای ښځه پیدا کړه» فلم، چې باردو یې په ۱۸ کلنۍ کې نړیوال شهرت ته ورسوله، هغه له جګړې وروسته د ازاد جنسي تفکر او د ژوند د نوې بڼې استازې وګرځوله؛ داسې رول چې د سیمون دوبووار په څېر مفکران او لیکوالان یې هم اغېزمن کړل.
د ژان-لوک ګدار له خوا جوړ شوی فلم «تحقیر» (Le Mépris)، چې د ښځې بدن او انځور ته یې انتقادي کتنه کړې وه، د باردو له هغو لږو رولونو څخه شمېرل کېږي چې د نقادانو له لوري یې پراخ ستاینه وشوه؛ تر دې چې نیویارک ټایمز دا د هغې تر ټولو غوره کار وباله.
همداراز، په ۱۹۶۸ کال کې د بریژیت باردو او سرژ ګنسبور لنډمهاله عاشقانه او موسیقايي همکاري د «باني او کلاید» په سندره کې، چې باردو یې په یو یاغي او قهرمانضد څېره کې وښوده، نړیوال بریالیتوب ته ورسېده.
باردو د ۱۹۷۰ لسیزې په پیل کې، د شهرت په اوج کې، له سینما څخه لاس واخیست او خپل ټول تمرکز یې د حیواناتو د حقونو ملاتړ ته واړاوه. هغې په ۱۹۸۶ کال کې د «بریژیت باردو بنسټ» جوړ کړ او د نړیوالو لیکونو او کمپاینونو له لارې یې د فوکانو د ښکار، د حیواناتو د وژنې او له ژوو سره د ناوړه چلند پر ضد مبارزه وکړه.
خو د هغې سیاسي دریځونه او توندې څرګندونې، په ځانګړي ډول د فرانسې د افراطي ښيلاسي جریان او د «ملي جبهې» ګوند (چې وروسته «ملي تجمع» ونومول شو) ښکاره ملاتړ، له پراخو لانجو سره مخامخ شو. د مهاجرت او لږکیو په اړه د هغې څرګندونو څو ځله د کرکې خپرولو په تور قضايي محکومیتونه هم راوپارول.
بریژیت باردو، چې په ۱۹۳۴ کال کې په پاریس کې زیږېدلې وه، څلور ځله واده کړی و او یو ماشوم یې درلود. هغه د خپل پیاوړي سینمايي او موسیقايي هڅو تر څنګ، د فرانسې په فرهنګي او سیاسي تاریخ کې د یوې اغېزمنې خو لانجمنې څېرې په توګه یادیږي.