تاند (شنبه د مرغومي – جدي ۶مه) د طالبانو د احصایې او معلوماتو ملي اداره وايي چې، د سږ کال په لیندۍ میاشت کې د نږدې ۲۵۰۰ بهرنیو وګړو تګ او راتګ ثبت شوی دی.
د دې ادارې د معلوماتو له مخې چې د هوايي ډګرونو او ځمکنيو بندرونو له لارې په یاده موده کې د ۴۳ ښځینهوو په ګډون ۱۳۲۰ بهرني وګړي هېواد ته راغلي او د ۲۶ ښځینهوو په ګډون، ۱۱۷۸ نور له هېواده وتلي دي.
یاده اداره وایي، چې، د ثبت شويو ارقامو له مخې ۱۳۰۵ کسان له ځمکنیو بندرونو او ۱۵ تنه نور د هوا له لارې هېواد ته راغلي، چې له ډلې یې ۱۹۶ تنه د هېواد د لرغونو او تاریخي سیمو د لیدنې او پاتې نور یې د کار په موخه راغلي دي.
د احصایې او معلوماتو ملي ادارې ویلي چې تر ټولو ډېر (۹۱۹) بهرني وګړي د نیمروز له بندر او ورپسې ۳۰۸ تنه د هرات له بندرونو او هوايي ډګر او پاتې نور د فاریاب آقینې بندر، د بلخ هوايي ډګر او حیرتان بندر له لارې هېواد ته راغلي دي.
د طالبانو یادې ادارې زیاته کړې چې، د ژوند پېښو او بهرنیو وګړو د ثبت ریاست په هېواد کې د ژوند پېښو (زېږونونه، مړینې، ودونه او طلاق)، د هوايي ډګرونو او رسمي بندرونو له لارې د بهرنیو وګړو د تګ او راتګ د ثبت او د هېواد د تابعیت اخیستلو او پرېښودو د اړوندو خدمتونو د وړاندې کولو مسوولیت لري.