تاند (جمعه د مرغومي ـ جدي ۵مه) د پښتون ژغورنې غورځنګ مشر یو ځل بیا ویلي چې، د پاکستان پوځ په پښتونخوا کې د وسلوالو د ځپلو په پلمه درواغجن عملیات ترسره کوي.
منظور پښتین وايي، دغه پوځ د همدې عملیاتو له مخې غواړي بې ګناه پښتانه له خپلو مېنو بې ځایه او بې کوره کړي.
پښتین زیاته کړې چې د پښتونخوا مختلفو سیمو کې خلک د استعماري پوځ په لاس په وینو کې ډوب دي او څوک یې د پوښتنې نشته.
نوموړی وایي چې، شمالي او سويلي وزیرستان، کورمه، خیبر او د پښتونخوا نورو سیمو کې د پنجشنبې په ورځ هم د پاکستان پوځ خلک بې کوره کړي او لا هم له وسلوالو سره د جګړې په پلمه د دواړو خواوو ډزو کې مرګ ژوبله ور اوښتې ده.