تاند ( چهارشنبه د مرغومي ـ جدي ۳مه)د ملګرو ملتونو د کډوالو لویې کمېشنرۍ اعلان کړی، چې د اسلامي پرمختیايي بانک په همکارۍ به په کونړ، کندهار او دایکنډي ولایتونو کې درې نوي روغتیايي مرکزونه جوړ شي.
دې کمېشنرۍ ویلي په دې سره به د کډوالو د یو ځايي راستنېدو له امله پر موجوده روغتیايي خدماتو د زیاتېدونکي فشار مخنیوی وشي.
د دې ادارې د خبرپاڼې له مخې، د کونړ روغتون به د ولایت د مرکز په توګه شاوخوا ۱۵۰ زره کسانو او د کندهار او دایکندي مرکزونه به هر یو شاوخوا ۴۵ زره وګړو ته روغتیايي خدمات برابر کړي.
دغه پروژه د افغانستان د بشردوستانه صندوق له درې میلیونه ډالرو بودیجې عملي کېږي.
تمه ده چې له دې مرکزونو به د ۲۴۰ زره زیات راستنېدونکي او کورنیو بې ځایه شوې وګړي ګټه واخلي.
دا اقدام په داسې حال کې کېږي چې راستنېدونکي کډوال د سرپناه، روغتیايي او تعلیمي خدماتو او د ژوند د اړینو وسایلو د نشتوالي له جدي ستونزو سره مخ دي.