تاند ( سې شنبه د مرغومي ـ جدي ۲مه) سیمه ییزې سرچینې وایي، چې د پښتونخوا په کرک سیمه کې ۶ پاکستاني پوځیان وژل شوي دي.
تر دې وړاندې پاکستاني رسنیو ویلي وو، چې یوازې څلور پاکستاني پوځیان په یوه برید کې وژل شوي او د هغوی موټر ته اور اچول شوی دی.
د راپورونو له مخې دغه پوځیان د تېلو او ګازو د یوه شرکت د کارکوونکو ساتونکي وو.
د برید مسوولیت تر اوسه چا نه دی منلی.
د یادونې وړ ده چې، وړمه ورځ بیا په همدې سیمه کې د TTP یو محلي قوماندان وژل شوی و.
پاکستان په دې وروستیو کې د ناامنۍ په لومه کې راګیر دی، چې د کارپوهانو په باور له حکومته یې د کنټرول لار ورکه ده.