تاند (سې شنبه، د مرغومي/ جدي ۲ مه) د «تحریک تحفظ آئین پاکستان» ائتلاف په اسلاماباد کې د مخالفو ګوندونو د دوو ورځنیو غونډو په پای کې، په یوه اعلامیه کې د اسلاماباد او کابل ترمنځ د کړکېچ د زیاتېدو په اړه خبرداری ورکړی او د دواړو هېوادونو ترمنځ د سرحدي لارو پر بېرته پرانیستلو او د سوداګرۍ پر بیا پیلېدو یې ټینګار کړی دی.
یاد ائتلاف همداراز د اختلافاتو د حل لپاره د خبرو اترو او دوهاړخیزو همکاریو غوښتنه کړې او له حکومته یې غوښتي چې د «خیبرپښتونخوا» ایالت د خلکو د امنیت د تأمین لپاره بېړني ګامونه واخلي.
په اعلامیه کې د پاکستان د حکومت پر ځینو اقداماتو هم نیوکه شوې، چې پکې د «تحریک انصاف» ګوند پر وړاندې چلند، د دغه ګوند د مشر عمران خان پر ضد فشارونه او ځپل شامل دي.
اعلامیه ټینګار کوي چې د یاد ګوند له غیرقانوني اقداماتو، د قضیو (غیرحقیقي) جوړولو او سپکاوي ډک چلند سره مخامخ شوی دی.
د «تحریک تحفظ آئین پاکستان» ائتلاف په دې اعلامیه کې د عمران خان او د هغه د مېرمنې په ګډون د ټولو سیاسي بندیانو د خوشې کېدو غوښتنه هم کړې ده.
د مخالفو ګوندونو دا دوه ورځنۍ غونډه، چې د «تحریک تحفظ آئین پاکستان» تر چتر لاندې جوړه شوې وه، ۱۲ مادهییزه اعلامیه خپره کړه، چې پکې د ګوندونو غوښتنې او اندېښنې تشریح شوې دي.
د «تحریک تحفظ آئین پاکستان» ائتلاف د حکومت مخالفو ګوندونو یو ټولګه ده، چې د اساسي قانون د ساتنې او د وګړو د حقونو د ملاتړ په موخه فعالیت کوي.