تاند (پنحشنبه، د لیندۍ/ قوس ۲۷ مه) سرچینې وایي چې د کابل ښار په مرکزي برخه کې د تاریخي آریانا سینما د نړولو لړۍ پیل شوې ده او ټاکل شوې چې پر ځای یې یو سوداګریز بازار جوړ شي.
له تېرو دوو ورځو راهیسې درنې ماشینرۍ لیدل شوي چې د ودانۍ لویې برخې نړوي.
د راپور له مخې، د سینما شاوخوا سیمه د طالبانو د ځواکونو لهخوا تړل شوې ده. په ټولنیزو شبکو کې خپرې شوې ویډیوګانې ښيي چې بلدوزرونه دیوالونه نړوي او د هغه ځای دننه، چې یو وخت د افغانستان یوه تر ټولو مشهوره سینما وه، له خاورې او کنډوالو ډک شوی دی.
آریانا سینما، چې د کابل د کلتوري میراث یو مهم سمبول او د هېواد له تر ټولو زړو سینماوو څخه ګڼل کېده، د نړولو په اړه تر اوسه د طالبانو لهخوا کوم رسمي وضاحت نه دی ورکړل شوی.
دا کار د تېرو کلونو د ورته لړۍ دوام بلل کېږي.
تر دې وړاندې د جمهوري په مهال د لومړۍ مرستیال ولسمشر امرالله صالح په امر د پارک سینما نړېدو هم ډېر انتقادونه پارولي وو. د پارک سینما د کابل لومړنۍ سیتما بلل کېده.
د کابل ښار اکثره سینماګانې په ۱۹ ۹۰ یمه لسیزه کې د تنظیمي جنګونو په مهال ونړېدې.
د طالبانو د حکومت په ترڅ کې څو نورې سینماوې هم نړول شوي دي چې له هغو څخه یوه د خیرخانې مېنې سینما وه. چارواکو اعلان کړی و چې هلته به جومات او بازار جوړ شي. همدارنګه، په هرات او کندهار ولایتونو کې هم ګڼې سینماوې تړل شوي یا نړول شوې دي.
آریانا سینما یو وخت د افغان فلم او هنري ژوند تود مرکز و.