تاند (پنج شنبه د لیندۍ – قوس ۲۷مه) افغانستان کې د قطر سفیر مردف القاشوطي، د راتلونکي کال په فبرورۍ میاشت کې د اسلامي هېوادونو په ترسره کېدونکي موزیم کې، افغانستان ته د ګډون بلنه ورکړې ده.
ټاکل شوې په دې نندارتون کې د افغانستان کلتوري او تاریخي اثار، د قطر په کوربهتوب د اسلامي هېوادونو د موزیمونو په یوه ګډ نندارتون کې نندارې ته وړاندې شي.
د طالبانو د اطلاعاتو کلتور وزارت پرون چهارشنبه په یوه خبرپاڼه کې ویلي، دا نوښت کابل کې د قطر د دولت د سفیر مردف القاشوطي له خوا وړاندیز شوی دی.
د قطر سفیر القاشوطي د نندارتون په اړه معلومات ورکړې دي او ویلې یې دي چې، دا نندارتون به د راتلونکي میلادي کال په دویمه میاشت کې پرانیستل شي، چې د بېلابېلو اسلامي هېوادونو چارواکي به یې د پرانیستې په مراسمو کې ګډون ولري.
نوموړي ټینګار وکړ چې دا نندارتون به د اسلامي هېوادونو ترمنځ د کلتوري اړیکو د پیاوړتیا ترڅنګ د هغوی تاریخي میراثونو ته وده ورکړي.
د خبرپاڼې له مخې، د دې نندارتون لپاره ۳۶ تاریخي اثار ټاکنه پای ته رسېدلې او د هغو د پر وخت لېږد لپاره یې اداري او لوژسټیکي چمتووالی روان دی.
د دغو اثارو د بڼې، تاریخي دورې او لرغونتیا په اړه معلومات نه دي ورکړل شوي.