تاند (یکشنبه، د لیندۍ/ قوس ۲۳ نع) د امریکا متحدوایالتونو د «UH-60A+ بلک‌هاک» هلیکوپټرو دوهمه جوپه پېرو ته سپارلې ده. د راپورونو له مخې، دا څرخکې له کولمبیا څخه لېږدول شوي، چې هلته له دې وړاندې د دغه هیواد د ملي پولیسو له‌خوا کارول کېدې.

د «SA Defensa» د راپور پر بنسټ، دا هلیکوپټرونه په اصل کې د افغانستان د هوايي ځواک په واک کې وو، خو په ۲۰۲۱ کال کې د طالبانو له واکمنېدو وروسته، یو شمېر بلک‌هاک هلیکوپټرونه ازبکستان ته وتښتول شول.

هغه مهال، ټولټال ۲۲ پوځي الوتکې او ۲۴ څرخکې، چې ۵۸۵ افغان پوځي پرسونل پکې سپاره وو، د ازبکستان فضايي حریم ته واوښتې او د ترمذ په هوايي ډګر کې کښېنستې.

کوم تجهیزات ازبکستان ته لېږدول شوي وو؟

د هغو تجهیزاتو په ډله کې چې د افغانستان له هوايي اډو څخه د ترمذ هوايي ډګر ته انتقال شول، لاندې الوتکې او هلیکوپټرونه شامل وو:

• د «Embraer EMB-314 Super Tucano» سپکې جنګي الوتکې
• د «Pilatus PC-12NG» څو موخیزې الوتکې
• هلیکوپټرونه، چې پکې «UH-60 بلک‌هاک»، «Mi-17» او سپک څو موخیز «MD-530» شامل دي

د طالبانو غوښتنه او د امریکا دریځ

د طالبانو استازو څو ځله ټینګار کړی چې دا الوتکې او هلیکوپټرونه د افغانستان شتمني ده او باید بېرته ور وسپارل شي. خو تاشکند په ځواب کې ویلي چې دا تجهیزات د امریکا ملکیت دي او د بېرته سپارلو وړ نه دي.

دغه دریځ وروسته د امریکايي چارواکو له‌خوا هم تایید شو.

پیرو ته د بلک‌هاک هلیکوپټرو لېږل

د ۲۰۲۵ کال په فبرورۍ کې، هغه اووه بلک‌هاک هلیکوپټرونه چې د امریکا دفاع وزارت د کار وړ بللي وو، بېرته متحده ایالاتو ته انتقال شول.

تر دې وړاندې، د ۲۰۲۴ کال په نوومبر کې، امریکا د «Sikorsky UH-60A+» بلک‌هاک څو موخیزو هلیکوپټرو لومړۍ جوپه، چې نهه هلیکوپټرونه پکې شامل وو، پېرو ته ډالۍ کړه. د پېرو کانګرس د دغو هلیکوپټرو ترلاسه کول او د پولیسو ځانګړو واحدونو ته یې سپارل تصویب کړل.

تمه ده چې په پیرو کې به له دغو څرخکو څخه د ځانګړو امنیتي عملیاتو، د پرسونل د لېږد، د طبیعي پېښو پر مهال د خلکو د ژغورنې، بیړنیو تخلیو او بشري مرستو د رسولو لپاره کار واخیستل شي.