تاند ( پنجشنبه د لیندۍ ـ قوس ۱۳مه) د هرات امنیه قوماندانۍ د یوې میاشتې موده کې د قتل، وسله والې غلا، د ناقانونه وسلو او نورو جنايي جرمونو په تور ۸۸ کسان نیولي دي.
هرات کې د طالبانو امنیه قومندان شیخ نقیبالله عزیزی ویلي، د عملیاتو پر مهال د دوهمې امنیتي حوزې پرسونل ۳.۹ میلیونه افغانۍ هم نیولې دي.
نوموړی وايي، په دې عملیاتو کې نیول شوي ۱۸ عرادې وسایط، ۵۳ موبایلونه او ۱۶۹ زره افغانۍ یې بېرته اصلي خاوندانو ته سپارل شوي او پاتې نورې میلیونونه افغانۍ به نن اصلي خاوندانو ته ورکړل شي.
عزیزی په یوه خبري کنفرانس کې دا هم ویلي، د ښار د امنیت د ښه والي لپاره په تېره یوه میاشت کې په شیدایي او خوش رود سیمو کې دوه نوې امنیتي حوزې جوړې شوې دي.
د هرات امنیه قوماندان په خبره، دغه اقدامات د ښار د اوسېدونکو او سوداګرو د امنیت خوندیتوب په موخه شوي دي.