تاند)پنجشنبه، د لیندۍ/ قوس ۱۳مه) څو افغان او پاکستاني سرچینو تایید کړې چې په سعودي عربستان کې د طالبانو او پاکستان ترمنځ د خبرو په وروستي پړاو کې د روان اوربند پر ساتلو هوکړه شوې ده.
دا خبرې په داسې حال کې شوې دي چې په وروستیو میاشتو کې د دواړو هېوادونو ترمنځ سرحدي ترینګلتیا زیاته شوې وه.
د رویټرز د راپور له مخې، درې افغان او دوو پاکستاني چارواکو – چې یو یې په استانبول کې مېشت دی – ویلي دا ناسته د سعودي عربستان په نوښت جوړه شوې وه او موخه یې د شخړو د بیا زیاتېدو مخنیوی او د کابل او اسلاماباد ترمنځ د دوامدارو خبرو لپاره د یوې لارې هوارول و.
د رسنیو له بیا بیا غوښتنې سره سره د پاکستان د بهرنیو چارو وزارت، د دې هېواد پوځ، د طالبانو ویاند او د سعودي عربستان حکومت تر اوسه د دې ناستې په اړه رسمي تبصره نه ده کړې. خو د طالبانو یوه جګپوړي چارواکي ویلي دي: «موږ د نورو ناستو د ترسره کېدو او یوې مثبتې پایلې ته د رسېدو لپاره بشپړ چمتووالی لرو.»
اوسنی اوربند له هغو خونړیو نښتو وروسته ټینګ شوی و چې په اکتوبر میاشت کې شوی و. تر دې مخکې قطر او ترکیې هم د دواړو لوریو ترمنځ د منځګړتوب هڅې کړې وې. د دوحې ناسته چې د قطر په کوربتوب ترسره شوه، د سمدستي اوربند د اعلان او د سرحدي څارنې پر مېکانېزم د هوکړې لامل شوې وه. همداراز، په استانبول کې د خبرو دوه پړاوونه هم ترسره شول، خو وروستۍ ناسته بې له کومې هوکړې پای ته ورسېده او دواړو لوریو یو بل د امنیتي ژمنو په نه عملي کولو تورن کړل.
د ریاض ناسته اوس د هغو نوو هڅو یوه برخه بلل کېږي چې موخه یې د تاوتریخوالي په راکمولو کې فعاله ونډه اخیستل او د کابل او اسلاماباد ترمنځ د اړیکو نژدې کول دي.