تاند ( دوشنبه د لیندۍ ـ قوس ۱۰مه) د افغانستان کرکټ بورډ په یوه اعلامیه کې ویلي، چې د ازبکستان له کرکټ فدراسیون سره یې د دغه هېواد په پلازمېنه تاشکند کې د دواړو هېوادونو ترمنځ د کرکټ د همکاریو د پراختیا او هلته د دغې لوبې د ودې په موخه هوکړه لاسلیک کړه.
د اعلامیې له مخې، د افغانستان کرکټ بورډ به د ازبکستان له کرکټ فدراسیون سره د کرکټ تخنیکي برخو کې د روزنې ترڅنګ د افغان ابدالیانو، له نولس کلنو کم عمره او د کورني کرکټ مخکښې لوبډلې به په ازبکستان کې د دغه هېواد له لوبډلو سره دوه اړخیزې لوبې هم کوي.
دغه راز به افغانستان کرکټ بورډ د کرکټ نړیوالې شورا د روزونکو په روزنیزو پروګرامونو کې د ګډون لپاره له ازبک روزونکو سره مرسته وکړي او هم به ازبک لوبغاړو ته په کابل کې د کرکټ بورډ د ظرفیت لوړونې مرکز کې د تمریناتو او روزنې فرصتونه برابر کړي.
خبرپانه وایي چې، دغه چاره به د ازبکستان کرکټ فدراسیون ته د کرکټ د ودې او پراختیا لپاره اړینې او عملي لوبیزې موقع برابرې کړي.
افغانستان کرکټ بورډ یو ځل بیا د د ازبکستان په څېر د کرکټ د نویو مخ پر وده هېوادونو د ملاتړ لپاره خپله ژمنتیا څرګندوي او چمتو دی له نورو هغو هېوادونو سره هم خپلې همکارۍ او تجربې شریکې کړي چې د دغې لوبې د ودې غوښتونکي دي.
دغه راز افغانستان کرکټ بورډ د خپلو تجربو، غوره مدیریت او هغو بریالیو لارو چارو شریکولو ته چمتووالی ښيي چې په نړیوال کرکټ کې یې د افغانستان په چټک پرمختګ کې ونډه اخیستې ده.