تاند (دوشنبه، د لیندۍ/ قوس ۱۰ مه) د ایران او ترکیې د بهرنیو چارو وزیرانو عباس عراقچي او هاکان فیدان، د یکشنبې په ورځ د نوومبر په ۳۰مه (د لیندۍ/ قوس ۹مه) په تهران کې له یو بل سره ولیدل او پر دوه اړخیزو اړیکو یې خبرې وکړې.
انقره او تهران د سوداګرۍ د پراخولو، د سرحدي لارو د پیاوړتیا، د مهاجرت په چارو کې د همغږۍ، او د سیمهییزو کړکېچونو پر ضد د ګډو هڅو پلانونه ترسیم کړي دي، او په ورته وخت کې یې د اسرائیل د تګلارو پر ضد خپل ګډ مخالفت بیا تأیید کړی دی.
ښاغلي فیدان له عراقچي سره په کتنه کې وویل چې ترکیې او ایران له افغانستان څخه د غیرقانوني مهاجرت د مخنیوي لپاره پر ګډو همغږیو بحث کړی او د دې پراخې سیمهییزې ننګونې د هوارولو لپاره یې د «ملموسې همکارۍ» غوښتنه کړې ده.
ترکیې ته اکثره افغانان له ایران څخه په قاچاقي لارو ځي او ترکیه له دې کبله له ایران څخه غواړي چې د افغانانو د قاچاقي تګ راتګ مخه ونیسي.
ترکیه هر کال له اروپايي اتحادیې څو میلیارد ډالره اخلي چې د اروپا لور ته د پناه غوښتونکو مخه ونیسي.
د دواړو هېوادونو د دوهاړخیزو اړیکو د ژورولو په لړ کې، انقرې د ایران هغه پلان ته هرکلی ویلی چې غواړي د ترکیې په ختیځ وان په ولایت کې نوې قونسلګري پرانیزي.
فیدان ویلي چې د نوې قونسلګرۍ د پرانیستې په مراسمو کې به له عراقچي سره یوځای ګډون وکړي.
دواړو وزیرانو همداراز هوکړه کړې چې د ترکیې او ایران د عالي ستراتیژیکې همکارۍ نهمه غونډه به «په مناسب فرصت» کې د ولسمشرانو په کچه تر سره شي.