تاند ( شنبه د لیندۍ ـ قوس ۸مه) د ترانسپورټ او هوايي چلند وزارت له شپږو شرکتونو سره د مسافرو وړونکو او باروړونکو وسایطو کې د GPS دستګاوو د نصب هوکړه لاسلیک کړه.
د طالبانو یاد وزارت نن شنبه لیکلي، د هوکړې له مخې به دغه شرکتونه په ټول هېواد کې په ټرانسپورټي وسایطو کې GPS لګوي او اړوندې اسانتیاوې به برابروي.
سرچېنه وایي دا اقدام به د ټرانسپورټي وسایطو په معیاري کولو او ښه مدیریت کې ښه رول ولوبوي.
دا اقدام وروسته له هغه اخیستل کېږي چې، په دې وروستیو کې د افغانستان پر لویو لارو ترافیکي پېښې زیاتې شوي چې، خلک یې لامل د موټر چلوونکو بې احتیاطي او د حاکم نظام بې پروایي یادوي.
افغانستان یو له هغو هېوادونو شمېرل کېږي چې، تر جګړې وروسته یې زیات خلک د ترافیکي پېښو قربانیان دي.
خلک وایي حکومت دې د ترافیکي پېښو مخنیوي برخه کې اقدامات چټک او د هغو شرکتونه مخه ونیسي چې د خلکو او مسافرو له ژوند سره بې احتیاطي کوي.