تاند (دوشنبه د لړم ـ عقرب ۱۹مه) ایران کې د طالبانو سفیر مولوي فضل محمد حقاني د چابهار بندر مشر دوکتور محمد سعید اربابي سره کتلي.
ایران کې د طالبانو سفارت ویلي، په دې کتنه کې دواړو لورو د خپلمنځي سوداګرۍ پر پراختیا، چابهار بندر کې د افغانستان صنعت او سوداګرۍ وزارت دفتر پرانیستل کېدو، د مالي اسانتیاوو لپاره د افغانستان او ایران مشترک بانک تاسیس، افغان سوداګرو ته د اوږد مهال لپاره د ځمکو ورکولو او د چابهار – میلک اوسپنې پټلۍ بشپړولو خبرې کړې دي.
یاد سفارت همداراز ویلي، دواړو لورو افغان سوداګرو ته د اوږدمهاله ویزو ورکړې او ستونزو ته په رسېدنې هم ټینګار کړی.
دغه کتنه داسې مهال کیږي، چې څو ورځې وړاندې د افغانستان او هند لپاره د ایران سفیرانو هم چابهار کې له افغان سوداګرو سره ګډه ناسته کړې وه.