تاند(جمعه، د لړم/ عقرب ۱۶ مه) پاکستاني رسنۍ، جیو نیوز وايي، د جمعې په ورځ په استانبول کې د افغانستان او پاکستان ترمنځ خبرې له خنډ سره مخامخ شوې، ځکه اسلاماباد ټینګار وکړ چې کابل باید له خپلې خاورې د ترهګرۍ د کنټرول مسوولیت پر غاړه واخلي.
دا په داسي حال کې ده چې تر دې مخکې د افغانستان پلاوي ته نژدې سرچینو ویلي و چې پاکستان د افغانستان د طالبانو له حکومته غواړي چې د هغو حملو د مخنیوي مسوولیت په غاړه واخلي چې د ډیورند کرښې پورې خوا ته کېږي.
د پاکستان پوځ ته نژدې رسنۍ، سما وايي چې پاکستاني پلاوی د استانبول هوايي ډګر ته تللی چې خپل هیواد ته راشي.
د سما د راپور له مخې، پاکستاني پلاوي خبرې پرېښي او دواړه منځګړي هیوادونه له موضوع خبر دي.
جیونیوز وايي، د دواړو هیوادونو ترمنځ په خبرو کې خنډ هغه مهال رامنځته شو چې پاکستان او د طالبانو حکومت د پنجشنبې په ورځ په استانبول کې د خبرو درېیم پړاو پیل کړ، څو د تېرې میاشتې له خونړیو نښتو وروسته رامنځته شوې ترینګلتیا راکمه کړي. دغه ناستې د پنځه ورځنیو خبرو دوام دی، چې په پای کې یې د لنډمهاله موافقې سبب شوې وې.
د پاکستان د اطلاعاتو وزیر، عطاالله تارړ، په ایکسپاڼه (تویټر) کې ولیکل:
«پاکستان د خپل وروڼو هېوادونو، ترکیې او قطر، د منځګړتوب مننه کوي؛ خو اوس مسوولیت د افغانستان پر غاړه دی چې د ترهګرۍ د کنټرول په برخه کې خپلې اوږدمهالې نړیوالې، سیمهییزې او دوهاړخیزې ژمنې عملي کړي — هغه ژمنې چې تر اوسه یې پوره کړي نه دي.»
هغه زیاته کړه چې پاکستان له افغان ولس سره د نېکو اړیکو غوښتونکی دی، خو د طالبانو د هغو اقداماتو ملاتړ نه کوي چې د افغانستان یا ګاونډیو هېوادونو پر ګټو منفي اغېز وکړي.
تارړ وویل:«پاکستان له افغان ولس سره هېڅ بد نیت نه لري، خو هېڅکله به د طالبانو د حکومت د هغو کړنو ملاتړ ونه کړي چې د افغانانو او د سیمې د ګاونډیو هېوادونو ګټې زیانمنوي.»
هغه ټینګار وکړ چې پاکستان به د خپلو وګړو او خپلواکي د ساتنې لپاره هر لازم اقدام وکړي:
«پاکستان به د خپلو خلکو د امنیت او خپلواکۍ د خوندیتوب لپاره هره ممکنه لار خپله کړي.»
له دې ولاړ حالت مخکې، د طالبانو او پاکستان ترمنځ د خبرو دوهم پړاو د اکتوبر په ۲۵مه په ترکیه کې ترسره شوی و.
د تېر پړاو په پای کې د ترکیې د بهرنیو چارو وزارت په ګډه اعلامیه کې وویل چې ټولو اړخونو د اوربند د دوام او د څار او ارزونې د یوه میکانیزم پر جوړولو هوکړه کړې، څو د سولې ډاډ ترلاسه کړي او د سرغړونو پر ضد اقدامات وشي.
د افغانستان د طالبانو حکومت د استانبول د خبرو د ځنډېدو او د پاکستان د نورو ادعاوو په اړه تراوسه څه نه دي ویلي.