تاند (پنجشنبه د لړم ـ عقرب ۱۵مه) د طالبانو د ارشاد، حج او اوقافو وزارت اعلان کړی، چې د کابل تاریخي عیدګاه مسجد به له دې وروسته د ښار د یوه فعال جامع مسجد په توګه فعال وي او پکې به د پنځه وخته لمونځونو لړۍ په منظم ډول پیل شي.
په خبرپاڼه کې ویل شوي، چې دغه پرېکړه د دیني شعائرو د پیاوړتیا، د جوماتونو د فعال ساتلو او د اسلامي ارزښتونو د ترویج لپاره شوې ده.
تر دې وړاندې په دې مسجد کې یوازې د اخترونو د لمونځونو مراسم ترسره کېدل.
د کابل عیدګاه د هېواد له مهمو تاریخي مساجدو دی، چې د شاه غازي امان الله خان په وخت کې د خپلواکۍ د اعلان ځای هم و.
دا مسجد د جمهوري نظام پر مهال د ولسمشر اشرف غني په ځانګړي حکم سره په اساسي توګه ورغول شو.