تاند (پنجشنبه د لړم ـ عقرب ۸مه) د ايران د کورنيو چارو وزير د تهران او کابل د اړيکو د پراختيا په ټينګار سره ويلي، چې له ګاونډيانو، په ځانګړي ډول له افغانستان سره د اړيکو پراخول د ايران د حکومت له لومړيتوبونو څخه دي.
اسکندر مومني دا څرګندونې د طالبانو د کورنيو چارو وزارت له مرستيال ملا ابراهيم صدر سره د ليدنې پر مهال کړې دي.
ملا ابراهیم صدر د اېکو د غړو هېوادونو د څلورمې غونډې لپاره تهران ته تللی و.
هغه د دواړو هېوادونو د تاريخي، فرهنګي او مذهبي ګډو ارزښتونو يادونه وکړه او ويې ويل، د ايران او افغانستان اړيکې د پراختيا په لور روانې دي او تهران چمتو دی چې د پولې پر امنيت، د نشه یي توکو پر ضد مبارزه او د اړوندو ستونزو د حل په برخو کې همکارۍ زياتې کړي.
د ايران د کورنيو چارو وزير همدارنګه وويل، د دغه هېواد حکومت چمتو دی چې په امنيتي، ترافيکي او تخنيکي (ټکنالوژۍمحوره) برخو کې له افغانستان سره ګډ کار وکړي او هيله يې څرګنده کړه، چې د تخنيکي ناستو له ترسره کېدو وروسته به د دواړو هېوادونو د ګډو همکاريو يو سند لاسليک شي.
د غونډې په دوام ملا ابراهيم صدر د ايران له مرستو مننه وکړه او ويې ويل، د طالبانو مشرتابه غواړي د ايران له تجربو څخه د امنيت د ټينګښت په برخه کې ګټه واخلي.
نوموړي همدارنګه وويل، په افغانستان کې د کوکنارو کر، قاچاق او د نشه يي توکو پلور راکم شوی دی.
د راپورونو له مخې، په دې ناسته کې د بې اسنادو افغان وګړو د سمون او د اقتصادي پروژو د پانګونې په اړه هم بحث شوی دی.
دغه اړيکې تل د افغانستان د سياسي او امنيتي تحولاتو، سيمه ييزو سياليو او د تهران د اندېښنو چې د افراطي ډلو د نفوذ په اړه دي تر اغېز لاندې وي.