تاند (دوشنبه، د لړم، عقرب ۵مه) د پاکستان او طالبانو ترمنځ د لوړې کچې خبرې اترې چې په استانبول کې روانې وې، د یکشنبې په ورځ تر هغه وروسته بېنتیجې پای ته ورسېدې چې د پاکستاني پلاوي له لوري وروستۍ غوښتنه مطرح شوه.
د پاکستان د جیو نیوز د راپور له مخې، پاکستان طالبانو ته وروستۍ ضربالاجل ورکړی و، چې باید د افغانستان له خاورې د فعالیت کوونکو ډلو د لهمنځه وړلو لپاره “روښانه او عملي ګامونه” واخلي.
راپور زیاتوي چې د ترکیې په منځګړیتوب دوه ورځنۍ خبرې بې له کومې هوکړې پای ته ورسېدې.
د دوهمې ورځې په مذاکراتو کې پاکستاني چارواکو خپل وروستی دریځ وړاندې کړ او ټینګار یې وکړ چې د اسلاماباد د اصلي امنیتي اندېښنو په اړه “هیڅ ډول جوړجاړی نه کېږي”.
دا په داسي حال کې ده چې افغان لوري پاکستان ته په سپارلې مسوده کې له پاکستانه غوښتي و چې د داعش له ملاتړه لاس واخلي.
د پاکستان امنیتي سرچینو خپلو رسنیو ته ویلي، د طالبانو د استازي استدلالونه “له واقعي شرایطو لیرې” وو او داسې ښکارېده چې هغوی له “سیمهییز ثبات سره په ټکر کې اجنډا” پر مخ وړي.
له بلې خوا، د افغانستان ملي راډیو−تلویزیون د یکشنبې په ورځ راپور ورکړ چې طالبانو د کړکېچ د کمولو لپاره “هر اړخیز وړاندیز” کړی دی. طالبانو د افغانستان د بشپړ حاکمیت د درناوي پر اړتیا ټینګار کړی او پاکستان یې تورن کړی چې امنیتي اندېښنې د سیاسي فشار د پلمې په توګه کاروي. طالب چارواکو ویلي چې هېڅ بهرنی هېواد ته به اجازه ورنه کړي د افغانستان د کورنیو چارو په اړه لارښوونې ورته وکړي او ادعا یې کړې چې د اسلاماباد غوښتنې د عادي دوهاړخیزو همکاریو له چوکاټ څخه ډېرې دي.
د خبرو پاتې راتلل د دواړو هېوادونو ترمنځ د زیاتېدونکو ترینګلتیاوو د کمولو په هڅو کې شاتګ بلل کېږي؛ هغه سیمه چې په وروستیو نښتو کې لسګونه کسان وژل شوي او سلګونه نور ټپیان شوي دي. مهمې لارې — لکه سپین بولدک، تورخم، شمالي او جنوبي وزیرستان، او خرلاڅي — لاهم تړلې دي.
یوه پاکستاني چارواکي چې جیونیوز خبرې چاینل ویلي: “اوس د خبرو دوام په بشپړ ډول د طالبانو په رغنده ګډون پورې تړلی دی.”
هغه زیاته کړه چې انقره هڅه کوي طالبان وهڅوي چې د سیمې امنیتي وضعیت په رسمیت وپېژني او د هغې مطابق چلند وکړي.
د پاکستاني رسنیو د معلوماتو له مخې، د استانبول خبرو ټولټال شاوخوا ۳۰ ساعته دوام درلود — په لومړۍ ورځ ۱۹ ساعته او په دوهمه ورځ ۱۱ ساعته.