تاند (دوشنبه، د لړم/ عقرب۵ مه) کابو یوه اوونۍ وروسته پولیسو په پاریس کې د لوور موزیم د فرانسوي پاچاهانو د قیمتي ګاڼو د غلا په تړاو په لومړي ځل دوه مشکوک کسان ونیول.
د فرانسوي رسنیو د راپورونو له مخې، چارواکو د لوور له اپولو ګالرۍ څخه د قیمتي شاهي ګاڼو د غلا په قضیه کې دوه کسان نیولي دي، چې یو تن یې په الوتکه کې سپور و او د الوتنې په درشل کې و.
ویل کېږي چې دا دوه کسان د پاریس د سین-سن-دوني (Seine-Saint-Denis) سیمې اوسېدونکي دي او د غلا د پېښو سابقه لري. اوس به پولیس له دوی څخه د ۹۶ ساعتونه پوښتنې- ګروېږنې کوي.
د پاریس څارنوالې، لاور بیکو، وویل چې د غلو ضد د ځانګړې قطعې (Anti-gang Brigade) پلټونکو دا نیونې کړې دي. هغې په خپل بیان کې په وخت د معلوماتو د نه خپرېدو له کبله خواشیني څرګنده کړه او ویې ویل چې دا کار د هغو څه باندې ۱۰۰ پلټونکو د فعالیت مخه خنډولی شي چې د غلا شویو ګاڼو د بېرته موندلو او ټولو ښکېلو کسانو د نیولو لپاره هڅې کوي.
تېره اوونۍ، څو غلو په رڼا ورځ د نړۍ مشهور لوور موزیم ته ننوتل. هغوی د جرثقیل (basket lift) په کارولو سره بالکونۍ ته ځان ورساوه چې د اپولو ګالري ته لاره لري، لومړی یې کړکۍ ماته کړه بیا یې د نندارې د ښودلو ښيښې ماتې کړې او هغه ګاڼې یې غلا کړې چې ارزښت یې شاوخوا ۸۸ میلیونه یورو اټکل شوی دی.