تاند (جمعه، د تلې/ میزان ۲۵ مه) د پاکستان د بهرنيو چارو وزارت وياند نن په یوه خبري غونډه کې وویل چې دا هیواد له افغانستان سره په کرښه کې د روان کړکېچ د سوله ییز حل په هدف په رغنده خبرو بوخت دی.
شفقت علي خان په اسلام اباد کې خبریالانو ته وويل، د طالبانو له لوري د اکتوبر له ۱۱مې تر ۱۵مې پورې «د سرحدي سيمو “پاروونکي بريدونه” د اندېښنې وړ دي، خو پاکستان د هغو مخه ونیوله».
وياند زياته کړه چې طالب ځواکونو ته درنه مرګ ژوبله اوۍښتې ده.
دا په داسي حال کې ده چې د ملګروملتو د راپور پر اساس، پاکستان پر ملکي سیمو بریدونه کړي چې له کبله یې ۱۸ ملکیان وژل شوي او ۳۴۶ تنه نور ټپیان شوي دي.
د پاکستان جنګي الوتکو په سپین بولدک کې پر یوه بازار په برید کې خلکو ته زیاته مرګ ژوبله واړوله. د ځايي چارواکو په وینا په دې برید کې ۴۰ ملکي افغانان وژل شوي دي.
خو شفقت علي خان نن ادعا وکړه: «زموږ ځوابي اقدام د ترهګرو عناصرو پر ضد و، نه پر ملکيانو»، او زياته يې کړه چې د طالبانو په غوښتنه د اکتوبر په ۱۵مه د ماښام له (۶ بجې) څخه ۴۸ ساعته اوربند نافذ شوی دی.
دا په داسي حال کې ده چې د افغانستان حکومت وايي چې د اوربند غوښتنه پاکستان کړې وه.
د پاکستان د باندنیو چارو وزارت دا هم وویل چې دواړه هېوادونه دا مهال د سولې د يوې هوکړې د موندلو لپاره مثبتې خبرې اترې کوي.
وياند خان زياته کړه چې پاکستان له تېرو څلوېښتو کلونو راهيسې تر څلورو ميليونو زياتو افغان کډوالو ته پناه ورکړې ده او اوس د نړيوالو اصولو او کورنيو قوانينو له مخې د بهرنيانو شتون تنظيموي.
هغه وويل: «پاکستان غواړي افغانستان يو سولهييز، باثباته او هوسا هېواد وي»، او هيله يې څرګنده کړه چې افغانان به يوه ورځ د استازي او د ټولو قومونو د ګډ حکومت تر سيورې لاندې په ازادۍ او سولې کې ژوند وکړي.
وياند همدارنګه د هند او افغانستان د وروستي شريک بيان پر محتوا جدي اعتراض څرګند کړ، ويې ويل چې د دې بيان د جمو او کشمير په اړه څرګندونې د ملګرو ملتونو د پرېکړو او نړيوالو قوانينو څرګنده سرغړونه ده.
ده د افغانستان د بهرنيو چارو وزير دا ادعا هم رد کړه چې ګواکې ترهګري د پاکستان داخلي ستونزه ده، او څرګنده يې کړه چې اسلاماباد لا دمخه د هغو فعالو ترهګرو ډلو تفصيلات له کابل سره شريک کړي چې د ده په وینا د افغانستان له خاورې فعاليت کوي.
ټاکل شوې چې افغانستان او پاکستان د اوربند پر غځېدو په دوحه کې خبرې وکړي