تاند (یکشنبه، د تلې/ میزان ۲۰ مه) د پاکستان او افغانستان ترمنځ د ډیورند کرښې په اوږدو کې د تېرې شپې په نښتو کې د دواړو لورو په وینا— لسګونه کسان وژل شوي دي.
د رویټرز خبري اژانس د راپور له مخې، دا له کله چې په افغانستان کې طالبان بیا واکته رسېدلي، د دواړو ګاونډیانو ترمنځ تر ټولو جدي جګړه بلل کېږي.
د پاکستان پوځ ویلي چې په دغو نښتو کې د دوی ۲۳ سرتېري وژل شوي، خو د طالبانو په وینا، د دوی له لوري ۹ کسان وژل شوي دي.
دا په داسي حال کې ده چې تر دې مخکې نن سهار پاکستان د خپلو درو پوځیانو وژل کېدا تایید کړې وه.
له هغه وروسته چې اسلاماباد له طالبانو وغوښتل د هغو یاغیانو پر ضد اقدام وکړي چې په پاکستان کې یې بریدونه زیات کړي دي او د پاکستان په ادعا د افغانستان له خاورې عملیات کوي، د دواړو هېوادونو اړیکې لا زیاتې ترینګلې شوې دي. طالبان، چې په ۲۰۲۱ کال کې واک ته رسېدلي، دا خبره ردوي چې پاکستاني یاغیان د افغانستان په خاوره کې مېشت دي.
له بلې خوا د طالبانو حکومت وايي چې پاکستان داعش ته په خپله خاوره کې ځای ورکړی چې له هغه ځایه په افغانستان اونورو هیوادونو کې تروریستي بریدونه وکړي.
د پاکستان پوځ ادعا کوي چې تر ۲۰۰ ډېر افغان طالبان او د دوی متحد جنګیالي یې وژلي، خو د افغانستان د دفاع وزارت بیا ادعا کړې چې ۵۸ پاکستاني سرتېري یې له منځه وړي دي.
د رویټرز خبري اژانس ویلي چې د دواړو خواوو دا شمېرې نه شي تأییدولی.
د پاکستان هوايي بریدونه او د طالبانو غچ اخیستونکي بریدونه
تېره پنجشنبه د پاکستان جنګي الوتکو د کابل او پکتیکا ولایت په برمل ولسوالي کې مرغه بازار بمبار کړی و، د پاکستاني امنیتي سرچینو او طالبانو په وینا، د دې بریدونو له امله طالبان غچ اخیستونکو بریدونو ته اړ شول. پاکستان تر اوسه په رسمي توګه دا هوايي بریدونه نه دي منلي.
افغان ځواکونو د شنبې په شپه ناوخته د پاکستان پر سرحدي پوستو ډزې وکړې، او د پاکستان پوځ وویل چې دوی هم د توپخانې او سپکو وسلو په وسیله ځواب ورکړی دی.
دواړو هېوادونو ادعا وکړه چې د مقابل لوري څو سرحدي پوستې یې ویجاړې کړې دي. پاکستاني امنیتي چارواکو ویډیوګانې خپرې کړې چې دوی یې د افغان پوستو د بمبار ثبوت بولي.
طالبانو هم د پاکستان د ویجاړو پوستو ویدوګانې او تصویرونه خپاره کړي.
د پاکستاني چارواکو په وینا، نښتې د یکشنبې تر سهاره تر ډېره پای ته رسېدلې وې، خو په کورمه سیمه کې لا هم ځینې وخت ناوخته ډزې اورېدل کېدې.
د افغانستان دفاع وزارت تر دې وړاندې ویلي و چې عملیات یې تېره شپه ۱۲ بجې پای ته ورسول. د کابل چارواکو د یکشنبې په ورځ وویل چې د قطر او سعودي عربستان په غوښتنه یې بریدونه درولي دي. دواړو عربي هېوادونو د نښتو په اړه اندېښنې ښودلې دي.
د طالبانو ویاند ذبیحالله مجاهد وویل:
«د افغانستان په هېڅ سیمه کې د خطر احساس نه شته. اسلامي امارت او د افغانستان ولس به د خپلې خاورې دفاع وکړي او په دې دفاع کې به ثابتقدم پاتې شي.»
مجاهد زیاته کړه چې په ځینو سیمو کې لا هم نښتې روانې دي.
د پولو تړل کېدل
پاکستاني چارواکو وویل چې له افغانستان سره د ۲۶۰۰ کیلومتره اوږده ګډه پوله، چې د ۱۸۹۳ کال د بریتانیا د استعمار پر مهال د «ډیورند کرښې» په نوم رسم شوې وه او اوس هم د دواړو لورو ترمنځ د شخړې ټکی دی، تړل شوې ده.
پاکستان دې کرښې ته «پوله» وايي خو افغانان یې فرضي کرښه بولي.