تاند (چهارشنبه د تلې ـ میزان ۱۶مه) افغان لوبډلې د بنګله دېش پر وړاندې د لومړۍ یو ورځنۍ لوبې لپاره تېر ماښام خپل وروستي تمرینات ترسره کړي.
افغان کرکټ بورډ وايي، دا تمرینات د یو ورځنیو لوبو د لوبلړۍ د چمتووالي په موخه شوي دي.
ټاکل شوې، چې د افغان کرکټ ملي لوبډله نن د افغانستان پر مهال د مازدیګر په ۴:۳۰ بجو د سیالۍ ډګر ته ښکته شي او د بنګله دېش پر وړاندې خپله یو ورځنۍ لوبلړۍ پیل کړي.
افغان لوبډلې له دې وړاندې د سیال بنګله دېش پر وړاندې درې نړیوالې شل اوریزې لوبې وبایللې.
د کرکټ څارونکي وايي، چې د ملي لوبډلې د وروستیو کمزورو پایلو اصلي لامل د لوبغاړو په ناسم غوراوي او د کرکټ بورډ په بې ثباته پالیسیو کې نغښتی دی.
هغوی له افغان کرکټ بورډ څخه د پراخو اصلاحاتو، حساب ورکونې او د وړتیا پر بنسټ د لوبغاړو د ټاکلو غوښتنه کړې ده.