تاند (چهارشنبه د تلې ـ میزان ۱۶مه) د طالبانو حکومت په یو شمېر ولایتونو کې د خواله رسنیو پر یو شمېر پلټفارمونو محدودیتونه لګولي دي.
د خواله رسنیو یو شمېر کارکوونکو تاند ته ویلي، چې د کابل په ګډون په یو شمېر ولایتونو کې پر “سنپ چت” او “انسټاګرام” محدودیتونه لګېدلي دي او پرته له (VPN) کار نکوي.
دغه راز د مخابراتو وزارت سرچینو رسنیو ته ویلي چې، دغه وزارت له مخابراتي شبکو غوښتي چې د خواله رسنیو یادې برخې محدودې کړي.
د “سنپ چت” او “انسټاګرام” افغان کاروونکي وایي، دغه محدودیتونه د پرون ورځ سې شنبې له ماسپښین راهیسې لګېدلي دي.
پر ټیک ټاک خو له وړاندې بندیزونه لګېدلي وو.
بل لورته پر خواله رسنیو ګڼو کسانو له طالبانو غوښتي چې د دې محدودیت د لګولو پر ځای دې خلکو ته کاري فرصتونه برابر او د پرمختګونو په اړه فکر وکړي.
بل لورته بیا سرچینو ویلي چې، کندهار کې یو ځل بیا د کورونو وایفای انټرنټونه بند شوي دي.
د سرچینو په خبره، دغه بندیز محدود دی او د بانکونو او صرافیانو په ګډون به ځینې مهمې ادارې انټرنټ ته لاسرسی ولري.
دغه بندیز د طالبانو په امر پلی شوی او عام هېوادوال به د سیمکارټونو له لارې په بشپړ ډول انټرنټ ته لاسرسی ولري.
دا نارویژئ اپ او ټولنیزه شبکه ده چي اصلي نوم یی سنپ چت دی، نه سنپ چپ.
مننه!