تاند (جمعه، د تلې/ میزان ۷ مه) د ملګرو ملتونو د امنیت شورا د پنجشنبې په ورځ د هند په غوښتنه د افغانستان د طالبانو د بهرنیو چارو وزیر امیر خان متقي د هند سفر تصویب کړ.
امنیت شورا پخوا هند ته د ښاغلي متقي له سفر سره مخالفت کړی و خو دا ځل یې په دې اړه د هند رسمي غوښتنه تایید کړې ده.
د News18 د راپور له مخې، جګپوړو سرچینو تایید کړې چې امنیت شورا هند ته د طالبانو د باندنیو چارو وزیر امیرخان سفر تایید کړی دی.
سرچینې وایي، متقي به وروسته له دې چې د اکتوبر په شپږمه روسیې ته سفر وکړي، د اکتوبر له ۹مې تر ۱۶مې پورې په نوي ډيلي کې وي.
د ملګرو ملتونو امنیت شورا دغه مهم پرمختګ تایید کړی دی.
د ملګروملتو امنیت شورا د ۱۹۸۸یم پرېکړه لیک له مخې، چې د طالبانو مشران یې په نښه کړي، متقي د نړیوالو سفرونو لپاره د امنیت شورا د کمېټې له مخکېنۍ اجازې پرته نه شي وتلی. د سپتمبر په ۳۰مه (شنبه)، امنیت شورا د هغه لپاره د سفر معافیت منظور کړ څو د اکتوبر له ۹مې تر ۱۶مې پورې نوي ډيلي ته ولاړ شي.
سرچینو زیاته کړې چې دا سفر د هند او طالبانو د اړیکو لپاره یو مهم ګام ګڼل کېږي، ځکه متقي به په نوي ډيلي کې د لوړې کچې په غونډو کې برخه واخلي. دا د هند د پاکستان او چین پر وړاندې د خپل دریځ د پیاوړتیا لپاره د هند ستراتیژیک اقدام هم بلل شوی دی.
امیر خان متقي د ۲۰۲۱ کال له اګست راهیسې، کله چې کابل د طالبانو لاس ته ولوېد، د افغانستان د بهرنیو چارو د وزیر په توګه دنده ترسره کوي.