تاند، دوشنبه، د جوزا ۵مه: قطر، هند، جرمني، اندونیزیا، ناروې او ازبکستان په افغانستان کې د کوچني اختر په مناسبت د دریو ورځو اوربند تود هرکلی کړی دی.
شپږو واړوهېوادونو افغانانو ته ارام اختر په برابرولو خوښي ښودلې او د دغه اوربند د دوام غوښتنه یې کړې ده.
قطر، جرمني، اندونیزیا، ناروې او ازبکستان په یو ګډ پیغام کې ویلي، افغانان د تاوتریخوالي د پای ته رسولو ترڅنګ د باعزته سولې او ثبات حق لري.
دغو پنځو واړو هېوادونو ښکیل لوري هڅوي چې له ځنډ پرته د افغان جګړې د پای ته رسولو لپاره په راتلونکو ورځو او اوونیو کې کوټلي ګامونه واخلي.
دغو هیوادونو د کوویډ ۱۹ ناروغۍ اړوند د ملګرو ملتونو د سرمنشي انتونیو ګوتریش د اوربند غوښتنې ته په اشاره ویلي، اوسنی اوربند باید وغځول شي او تاوتریخوالی د پام وړ راکم شي تر څو افغانان تر ډېره هوسا ژوند ولري او د کورونا پر ضد مبارزه په اغېزناک ډول ترسره شي.
په دغه ګډه اعلامیه کې د ژر تر ژر بندیانو تبادله باندې هم تینګار شوی او په کې راغلي چې دغه هیوادونه به د ښکیلو لوریو په غوښتنه د سولې په چارو کې هر ډول مرستې ته راودانګي.
بلخوا هند هم په یو جلا پیغام کې د درې ورځني اوربند هرکلی کړی دی خو د بشري مرستو د رسولو لپاره یې د دغه اوربند د غځولو غوښتنه کړې ده.
د هند د بهرنیو چارو وزارت ویلي، دوی به د افغانانو د خپلواکۍ، سولې او هوساینې لپاره تل له افغانستان سره ولاړ وي او په وینا یې د اوربند غځول به واقعي سولې ته لاره هواره کړي
دا په داسې حال کې ده چې نن د افغان حکومت او طالبانو لخوا د اختر په مناسبت د اعلان کړي اوربند دویمه ورځ ده او تېره ورځ ولسمشر غني د طالبانو د ۲ زره بندیانو د چټکې ازادۍ امر وکړ چې د امریکا په شمول ګڼو لوریو دا کار وستایه.