تاند (یکشنبه، د وږي/ سنبلې ۳۰ مه) د کرېکټ نړیوالې شورا اعلان کړی چې د افغانستان د کرکټ د ملي لوبډلې دوو لوبغاړو نور احمد لکڼوال او مجیبالرحمان ته د سریلانکا پر وړاندې په اسیايي جام کې د لوبې پر مهال د تخلف له امله خبرداری ورکړل شوی دي.
د دې شورا په وینا:
- نور احمد د لوبې پر مهال د امپایر د پرېکړې پر ضد د اعتراض له امله د چلند مقررات مات کړي.
- مجیبالرحمان د لوبو د وسایلو د ناسمې کارونوې له کبله تخلف کړی.
دواړو لوبغاړو خپل تخلفونه منلي دي، له همدې امله هغوی ته د خپل کړنو په اړه د توضیحاتو ورکولو ته اړتیا نه ده پیدا شوې.
همداراز د دوی په انضباطي ریکارډ کې یو ـ یو منفي امتیاز ثبت شوی دی. دا لومړی ځل دی چې په وروستیو تېرو دوو کلونو کې نور احمد او مجیبالرحمان انضباطي سرغړونې کوي.
په همدې لوبه کې د افغانستان لوبډلې د سریلانکا پر وړاندې په شپږو وېکټو ماتې وخوړه او له سیالیو څخه ووته.