تاند (شنبه، د وږي/ سنبلې ۲۹ مه) د پاکستان د بهرنیو چارو وزارت ویاند د امریکا د ولسمشر د وروستیو څرګندونو په غبرګون کې وویل چې د بگرام د هوايي اډې بېرته نیول د افغانستان او امریکا ترمنځ موضوع ده او اسلاماباد یې په اړه هېڅ دریځ نه لري.
د پاکستان د بهرنیو چارو وزارت ویاند «شفقت علي خان» د ولسمشر ډونالډ ټرمپ له هغو څرګندونو وروسته چې ویلي یې وو د بگرام هوايي اډې د بېرته نیولو هڅه کوي، محتاط دریځ غوره کړ او څرګنده یې کړه چې دا موضوع د امریکا او افغانستان په دوه اړخیزو اړیکو پورې اړه لري او پاکستان یې په اړه نظر نه لري.
هغه زیاته کړه، اسلاماباد د سیمې تحولاتو ته ځیر دی، خو په دې ځانګړې موضوع کې دریځ نه لري.
ولسمشر ټرمپ په لندن کې ویلي و: «موږ هڅه کوو چې د بگرام هوايي اډه بېرته ونیسو.»
بلخوا، د طالبانو د کورنیو چارو وزارت ویاند «عبدالمتین قانع» د امریکا د ولسمشر د وروستیو څرګندونو په غبرګون کې وویل: «د بگرام هوايي اډې د بېرته نیولو په اړه د ټرمپ څرګندونې له واقعیت څخه لیرې او هل کرکې ډکې دي. افغانستان هیڅکله دا اډه نه سپاري او خلک به د بهرني پوځ حضور ونه مني.»
د ټرمپ د څرګندونو په اړه چین نسبتاً نرم غبرګون وښود. د چین د باندنیو چارووزارت ویاندې ټینګار کړی چې په افغانستان کې هر ډول پوځي کړکېچ د ګاونډیو هېوادونو او ټولې سیمې ثبات او امنیت ګواښي .روسیې د لویدیځ دا هڅه چې افغانستان ته بیا پوځ لیږي، په کلکه غندلې ده.