تاند (چهارشنبه، د وږي/ سنبلې ۲۶ مه) د اروپایي اتحادیې د کوپرنیکس د اقلیمي بدلون د څارنې د ادارې د راپور پر اساس، اروپا له ۱۹۸۰مو کلونو راهیسې د نړۍ د اوسط په پرتله دوه چنده چټکه توده شوې ده.
د هسپانیا چارواکو د سې شنبې په ورځ وویل چې سږنی اوړی د جنوبي اروپا د دغه هېواد د تودوخې له نظره تر ټولو ګرم دوبی و. هسپانیا، د مدیترانې د ټولې سیمې په څېر، د اقلیمي بدلون له سختو اغېزو سره مخامخ ده.
د ملي هوا پېژندنې ادارې وویل، د هېواد منځنۍ تودوخه د جون له لومړۍ نېټې څخه د اګست تر ۳۱مې پورې ۲۴.۲ د سانتي ګراد درجې وه.
دا هغه تر ټولو لوړه تودوخه ده چې له ۱۹۶۱ کال راهیسې یې د هوا پېژندنې اداره ثبتوي.
پخوانی ریکارډ، چې ۲۴.۱ درجې و، په ۲۰۲۲ کال کې ثبت شوی و. سږنی اوړی همداراز د ۱۹۹۱ – ۲۰۲۰ کلونو د اوسط په پرتله ۲.۱ درجې تود و.
تر ټولو توده ورځ، د اګست ۱۷مه وه چې د تودوحې درجه د سانتي ګراد ۴۵.۸ درجې وه او د دغه هیواد د جنوب په «خیرېز د لا فرونتیرا» کې ثبت شوه.
د ملګرو ملتونو په وینا، د مدیترانې سیمه د نړیوال اوسط په پرتله ۲۰٪ ګړندۍ تودېږي.
د ډېرې تودحې له کبله د دوبي په میاشتو کې د هسپانیا په کلیوالو سیمو کې پراخ ځنګلي اورونه ولګېدل.
د اروپایي اتحادیې د «اروپایي ځنګلي اورونو د معلوماتو سیسټم» د معلوماتو له مخې، سږ کال ۳،۸۲۰ مربع کیلومتره ځمکه وسوځېدله، چې ۲۰۲۲ د ۳،۰۶۰ مربع کیلومتره پخوانی ریکارډ یې مات کړ.
د هسپانیا د هوا پېژندنې اداره وايي، دغه هېواد په ځانګړې توګه وچ دوبی هم تجربه کړ، په ځانګړي ډول د شمال لویدیځ په هغو سیمو کې چې ځنګلي اورونو تر ټولو ډېر زیان اړولی و.