تاند(شنبه، د وږي/ سنبلې ۲۲ مه) د اسوشیتیدپریس خبري اژانس د راپور له مخې، طالبانو ویلي چې د شنبې په ورځ یې د امریکا د ولسمشر ډونالډ ټرمپ د ادارې له استازو سره د افغانستان او متحدو ایالتونو د اړیکو د عادي کولو په اړه خبرې کړي دي.
د سپینې ماڼۍ له لوري په دې اړه کومه اعلامیه نه ده خپره شوې او نه یې هم د تبصرې غوښتنې ته سمدستي ځواب ورکړی. د طالبانو په خبرپاڼه کې ویل شوي چې د دې ډلې د بهرنیو چارو وزیر امیر خان متقي د ټرمپ د ادارې د بندي امریکایانو د چارو له ځانګړي استازي ادم بوهلر او د امریکا له بل استازي زلمی خلیلزاد سره لیدلي دي.
طالبانو د دې کتنې تصویرونه هم خپاره کړي دي. په خبرپاڼه کې راغلي:
«د دواړو هېوادونو د اړیکو د پراختیا، د اتباعو اړوند مسایلو او د افغانستان د پانګونې د فرصتونو په اړه هر اړخیزې خبرې شوې دي.»
خبرپاڼه زیاتوي چې د امریکا پلاوي د تېرې میاشتې په پای کې د افغانستان د ختیځ د ویجاړوونکي زلزلې په تړاو د خواخوږۍ مراتب هم وړاندې کړي دي.
دا کتنه وروسته له هغې شوې چې طالبانو د امریکا یو تبعه جورج ګلیزمان خوشې کړ، چې افغانستان ته د سفر پر مهال نیول شوی و. هغه د ټرمپ د ولسمشرۍ له پیله درېیم امریکایي و چې طالبانو خوشې کړی.
دا لیدنه همداراز وروسته له هغې شوې چې طالبانو د ټرمپ پر نوې سفري بندیز توندې نیوکې وکړې، هغه بندیز چې امریکا ته د افغانانو د تګ مخنیوی کوي.