تاند (چهارشنبې، د وږي/ سنبلې ۱۹ مه) په بغلان ولایت کې د یوې ترافیکي پېښې له امله ۹ تنه مړه شوي او ۷ نور ټپیان دي.
د بغلان امنیه قوماندانۍ په یوه خبرپاڼه کې ویلي چې دا پېښه نن چهارشنبې د «پلفي» په کوتل کې هغه مهال وشوه چې د سپرلیو یو موټر له سړکه واوښت او درې ته ولوېد.
په خبرپاڼه کې راغلي چې د مړو کسانو په ډله کې دوې ښځې او د ټپیانو په منځ کې څلور ماشومان شامل دي.
په وروستیو میاشتو کې په هېواد کې ترافیکي پېښې ډېرې شوې دي. یوازې په تېرو درې ورځو کې، د همدې ۹ کسانو ترڅنګ، ۱۳ تنه نور په دوو ترافیکي پېښو کې په بدخشان او ننګرهار کې مړه شوي دي. د ډرېورانو بېاحتیاطي او د مناسبو سړکونو نشتوالی د ډېری پېښو لامل بلل شوی دی.
د پلفي کوتل د بغلان مرکز پلخمري او د دې ولایت د درې ولسوالیو ترمنځ یو له خطرناکو او ستونزمنو لارو څخه دی، چې هر کال پکې د مرګونو ترافیکي پېښو راپورونه ورکول کېږي.