تاند (سې شنبه، د وږي/ سنبلې ۱۹ مه) د چین د بهرنیو چارو وزارت ویاند د دوشنبې په ورځ وویل، هیواد به یې له افغانستان سره یوځای کار وکړي چې له دې ستونزمن وخت څخه تېر شي او زلزله ځپلو سیمو ته مرستې ژر تر ژر ورسوي،.
ویاند «لین جیان» چې په یوه عادي خبري غونډه کې خبرې کولې، دا خبره هغه مهال وکړه چې د افغانستان د اګست د ۳۱ نېټې د زلزلې په اړه ورڅخه پوښتنه وشوه.
لین وویل چې چین د افغانستان د زلزلې حالت له نژدې څاري.
د چین ولسمشر شي جینپینګ، د سپتمبر په ۱ نېټه، په تیانجین کې د «شانګهای همکارۍ سازمان (SCO) پلس» غونډې کې د زلزلې د تلفاتو په اړه ژورې خواخوږي څرګنده کړه. ده وویل له هغو کسانو سره غمشریکي کوي چې خپل عزیزان یې له لاسه ورکړي دي او له پېښې اغېزمن شوي دي. ده هیله څرګنده کړه چې د افغانستان حکومت او خلک به ژر له دې سخت وخت څخه ووځي او خپل کورونه به بیا ورغوي.
د لین په وینا، د چین حکومت اعلان وکړ چې افغانستان ته به د بیړنیو بشري مرستو په چوکاټ کې ۵۰ میلیون یوان (شاوخوا ۷.۰۴ میلیون امریکايي ډالر) مرسته وکړي. په دې مرسته کې به خیمې، کمپلې، ترپالونه، خوراکي توکي او نور بیړني اړین مواد شامل وي.
هغه زیاته کړه چې د مرستو لومړۍ جوپه د یکشنبې په ورځ په الوتکه کې کابل ته رسېدلې ده او پاتې توکي به په راتلونکو ورځو کې واستول شي.
لین وویل چې په افغانستان کې د چین سفارت، د چینایي مؤسسو او د بهر مېشتو چینایانو د ټولنې د مرستو لپاره پیسې او توکي راټول کړي او ډالۍ کړي دي. همداراز د چین د سره صلیب ټولنې د افغانستان له سره میاشت ټولنې سره نغدي مرسته کړې ده.
لین څرګنده کړه: «افغانستان تل زموږ دوست ګاونډی او ستراتیژیک همکار پاتې شوی دی. موږ باور لرو چې د افغانستان د حکومت په مشرتابه کې به د افغانستان خلک سره یوځای شي او ژر به له دې پېښې څخه راووځي او خپل کورونه به بیا جوړ کړي.»