تاند/چهارشنبه د وږي ـ سنبلې ۵مه/ د طالبانو ستره محکمه وايي، د غور ولایت په ساغر ولسوالۍ کې یې د درې ښځو په ګډون اووه تنه په عام محضر کې په دُرو وهلي دي.
د یادې محکمې د خبرپاڼې له مخې، دا کسان په نامشروع اړیکو او له کوره په تېښته تورن وو.
خبرپاڼې زیاته کړې، چې دغو کسانو ته له ۳۰ تر ۳۹ درو بدني سزا او له شپږو میاشتو تر دوو کلونو د تنفیذي بند سزا هم اورول شوې ده.
په عام میدان کې د سزا دې غونډې ته طالبانو د سیمې ځوانان، قومي مشران، دیني عالمان، طالب جنګیالي او خپل دولتي مامورین هم ور غوښتي وو.
طالبانو وړمه ورځ په پروان کې د دوو مېرمنو په ګډون ۱۲ تنه د بېلابېلو جرمونو په تور په عام محضر کې پر سزا سربېره له یوه تر څلورو کلونو پر تنفیذي بند محکوم کړي دي.