تاند/چهارشنبه د وږي ـ سنبلې ۵مه/افغان کرکټ بورډ ویلي، ملي لوبډلې ته یې د ایرلنډ کرکټ لوبډلې پخوانی الراونډر «جان موني» د ډګرساتنې د نوي روزونکي او د استرالیایی «نیرملان تنابالزینګم» یې د نوي فیزیوتراپېسټ یا ډاکټر په توګه وګماره.
کرکټ بورډ نن(چهارشنبه، د اګسټ ۲۷مه) ویلي، دواړه روزونکي اوسمهال د روان تمریناتي کمپ لپاره لوبډلې سره یو ځای شوي دي او راتلونکو نړیوالو سیالیو لپاره به هم د هېواد ملي لوبدلې سره یو ځای وي.
جان موني د ایرلنډ کرکټ ملي لوبډلې لپاره د۹۱ نړیوالې سیالۍ ترسره کړې او د یو ورځنیو نړیوالو سیالیو په درې نړیوالو جامونو او همدراز د شل اوریزو سیالیو په دوو نړیوالو جامونو کې د دغه هېواد په ګټه لوبېدلی دی.
موني له دې وړاندې په ۲۰۱۸ – ۲۰۱۹ کلونو کې هم د افغانستان ملي لوبډلې د ډګرساتنې د روزونکي په توګه دنده ترسره کړې او همدارنګه په ۲۰۱۹ کال کې د ویسټ انډیز ملي لوبډلې د ډګرساتنې روزونګی هم پاتې شوی دی.
له دې سره نیرملان تنابالازینګم په ۲۰۱۰ کال کې د استرالیا له سیډني پوهنتون څخه د فیزیوتراپۍ په برخه کې د ماسترۍ او په ۲۰۰۸م کال کې له همدې پوهنتون څخه د ورزشي او فزیکي تمریناتو په برخه کې د لېسانس سند ترلاسه کړی او د استرالیا د فزیوتراپۍ ادارې او د دعه هېواد فزیوتراپۍ ټولنې فعال غړی هم پاتې شوی دی.
نوموړی د متحده عربي اماراتو او سریلانکا لوبډلې روزونکی هم و.
د یادونې وړ ده چې افغان لوبډله اوسمهال په متحده عربي اماراتو کې د پاکستان او اماراتو پر وړاندې د درې اړخیزې لوبلړۍ او د ۲۰۲۵م کال اسیا جام سیالیو لپاره د چمتووالي په موخه پر تمریناتو بوخته ده.
درې اړخیزه لوبلړۍ سبا نه بله ورځ د جمعې په ورځ پیلېږي، چې په لومړۍ لوبه کې افغانستان د پاکستان پر وړاندې د لوبې ډګر ته ووځي.