تاند/سه شنبه د وږي ـ سنبلې ۴مه/اسراییلي ځواکونو د دوشنبې په ورځ د غزې په ناصر روغتون برید کې د ۲۰ فلسطینیانو په ګډون ۵ خبریالان هم ووژل.
وژل شوي خبریالان د نړیوالو رسنیو، رویټرز، اسوشیټیډ پرېس، الجزیرې او نور سیمه ییز فري لاینسران دي.
دغو خبریالانو د خبري پوښښ پر مهال د اسراییلي ځواکونو په دویم برید کې ژوند له لاسه ورکړ.
دغه برید ته ګڼ شمېر اروپايي هېوادونو، ملګرو ملتونو غبرګونونه ښودلي.
د طالبانو حکومت هم دې برید ته سخت غبرګون ښودلی دی.
ملګرو ملتونو پر دې برید خواشیني ښودلې او د بې پرې څېړنو غوښتنه یې کړې ده.
کاناډا، فرانسې، جرمني، ترکیې، قطر، سعودي او د خبریالانو ملاتړو سازمانونو د خبریالانو په نښه کول غندلي او د هغوی پر خوندیتوب یې ټینګار کړی.
د بې پولې خبریالانو سازمان یا ار ایس ایف ویلي، چې غزه کې پر خبریالانو د اسراییلو برید ښيي، چې د دوی د خوندیتوب نړیوال قانون نه عملي کېږي.
بل خوا په افغانستان کې د طالبانو حکومت غزه کې د خبریالانو وژل «لوی جنایت» او دا یې د بیان آزادۍ د مدعیانو پر لمنه «تور داغ» ګڼلی دی.
دا لومړنۍ پېښه نه ده، د معلوماتو له مخې، د اسراییل او حماس د جګړې له پیله تر ۲۵۰ خبریالان په غزه کې وژل شوي دي.
د عامو وګړو او خبریالانو د بیرحمانه او ظالمانه وژنو په وړاندی د غربیانو د خولې وچه غندنه په حقیقت کی د صهیونیزم د نورو پټو ورانوونکو پلانونو د پلی کولو یوه غولوونکې سناریو ده.