تاند/دوشنبه د وږي ـ سنبلې ۲مه/د طالبانو د احصایې او معلوماتو ملي ادارې د ثبت شویو ارقامو په بنسټ ویلي، په تېره زمري میاشت کې ۲زره ۳۳۷ بهرنیو وګړو افغانستان ته تګ راتګ کړی دی.
د یاد ادارې ثبت شوي ارقام ښیي، چې په یاده موده کې د ۶۷ ښځینهوو په ګډون ۱۳۰۵ بهرني وګړي هېواد ته راغلي او د ۳۰ ښځینهوو په ګډون، ۱۰۳۲ نور له هېواده وتلي دي.
سرچینه وايي، هېواد ته د راغلو بهرنیو له ډلې ۱۲۸۳ کسان د ځمکنیو بندرونو او ۲۲ تنه نور د هوا له لارې ته راغلي دي.
د دوی له دې ډلې ۲۳۶ تنو د هېواد له لرغونو او تاریخي سیمو لیدنه کړې.
د طالبانو د کورنیو چارو وزارت مسؤلانو په وار وار د افغانستان ټولو چارو په ځانګړې توګه هېواد ته د بهرنیو وګړو راتګ ته په اشارې سره ویلي، چې افغانستان خوندي دی او ډاډ ورکوي، چې د طالبانو حکومت له قانوني لارې هېواد ته په را داخلېدو د هر چا حقوقو ته پوره ژمنتیا لري.
افغانستان ته د بهرنیو سیلانیانو راتګ داسې مهال زیاتېږي، چې د بېوزلۍ او بېکارۍ له امله په زیات شمېر افغانان د وطن پرېښودو لارې لټوي.
دوی وایي:” که وطن ښکلی وي، خو چې روزګار سم نه وي څه به یې کړې.”
خو طالبان بیا وایي هڅه کوي ځوانانو ته کاري زمینې برابرې کړي او د غیر قانوني مهاجرت مخه ونیسي.