تاند『یکشنبه د وږي ـ سنبلې ۲مه』په میدان وردګ ولایت کې د طالبانو د پېښو پر وړاندي د مبارزې او چمتووالي ریاست وايي، د چک ولسوالۍ په کښته خوات کلي کې د یوې پخوانۍ مرمۍ د چاودنې له امله یو زده کوونکی وژل شوی او څلور نور ټپيان شوي دي.
په دې اړه خپره شوې خبرپاڼه لیکل شوي چې، پرون (شنبه) غرمه مهال د کوچنیانو د لوبو پرمهال یوې زړې مرمۍ چاودنه کړې او مرګ ژوبله یې اړولې ده.
په خبرپاڼه کې راغلي چې، ټپيان له ۱۲ څخه تر ۱۶ کلونو عمرونه لري او د درملنې له پاره د دغه ولایت د مرکز میدان ښار روغتون ته لېږدول شوي دي.
افغانستان په تېرو کابو ۵ لسیزو کې د جګړو شاهده پاتې شوې، چې په ډیری سیمو کې اوس هم ناچاوده مرمۍ شته او وخت نا وخته ماشومانو باندې د لوبو پرمهال چاودنه کوي.
د نظر خاوندان وایي په لرې پرتو سیمو کې په دې تړاو عامه پوهاوي ته اړتیا ده او حاکم نظام باید هغه سیمې پاکې کړي چې د پخوانیو مرمیو او ماینونونو د شتون ګواښ په کې وي.
د یوه بل خبر له مخې په غزني ولایت کې د ترافیکي پېښو له امله ۱۴ کسانو ته مرګ ژوبله اوښتې ده.
دغه پېښې مرکز غزني ښار او آب بند ولسوالۍ کې شوي، چې ۲ تنه په کې مړه او ۱۲ نور ژوبل دي.