تاند『سه شنبه د زمري ـ اسد ۲۸مه』ننګرهار لپاره د طالبانو امنیه قومندانۍ وایې، د دغه ولایت په سره رود ولسوالۍ کې وسله والو د یوې کورنۍ شپږ غړي وژلي.
ځایي خلک وایي د دې کورنۍ یو غړي په جمهوري نظام کې دنده درلوده.
پېښه تېره شپه د سره رود ولسوالۍ د کوز سلطانپور اړوند «بړینې» سیمه کې شوې او پکې څلور ماشومان، یوه ښځه او یو سپین ږېری وژل شوي دي.
د وژل شوې کورنۍ یو غړی د جمهوري حکومت پرمهال نظامي دنده درلوده خو د طالبانو له واکمنېدو راهیسې د سر خوندیتوب لپاره جرمني ته کډوال شوی او هلته اوسېږي.
په دغه پېښه کې د نوموړي پلار مور او مېرمن او بچیان وژل شوي دي.
د دې پېښې انګېزه مالومه نه ده او نه هم طالبانو د دې پېښې په اړه د چا د نیولو خبره کړې ده.
د طالبانو واکمنېدو سره د جمهوري نظام امنیتي ځواکونه په نښه کېږي، خو په ډېرو کمو پېښو کې د دوی د کورنۍ غړي وژل کېږي.
د ملګرو ملتونو وروستي رپوټ کې هم اندېښنه ښودل شوې چې په تېرو دریو میاشتو کې د جمهوریت ۷ نظامیان وژل شوي دی.