تاند『دوشنبه د زمري ـ اسد ۲۰مه』کندهار کې د طالبانو د کرنې اوبو لګولو او مالدارۍ ریاست مسوولان وایي، سږ کال په دغه ولایت کې د انځرو په حاصلاتو کې د تېر کال په پرتله ۴۰ سلنه زیاتوالی راغلی دی.
یاد ریاست په یوه خبرپاڼه کې زیاته کړې چې، سږ کال د دغه ولایت په دامان، ډنډ، پنجوايي، ارغنداب، لوړ او کښته شاولیکوټ، نېش، میانشین او خاکرېز ولسوالیو کې پر ۱۵ زره هکټاره ځمکه د انځرو له باغونو به د اټکل له مخې ۱۳۵ زره ټنه حاصل ترلاسه شي.
په خبرپاڼه کې د غیر موسمي ناروغیو او بارانونو کموالی هغه څه یاد شوي چې، یو څه یې د سږنیو مېوو حاصلات زیانمن کړي.
که څه هم سږ کال په کندهار کي د انځرو په ګډون د یو شمېر نورو مېوو په حاصلاتو کې زیاتوالی راغلی؛ خو کروندګر یې وايي چې، بازار یې کمزوری دی او باید بهرنی بازار یا سړې خوني ورته جوړي شي.
کندهار د انځرو ترڅنګ د انارو په تولید کې مخکښ ولایت یادېږي چې هر کال په زرونو ټنه انار د هېواد د ولایتونو ترڅنګ نورو هېوادونو ته صادروي.