تاند『شنبه د زمري ـ اسد ۱۸مه』په هلمند، بلخ، کندز او بدخشان ولایتونو کې پرون جمعه او نن شنبه د ترافیکي پېښو له امله ۱۸ کسانو ته مرګ ژوبله اوښتې ده.
طالب مسوولان وایي په یادو ولایتونو کې څلور ترافیکي پېښې رامنځته شوي، چې له امله یې ۹ کسان وژل شوي او ۹ تنه نور ژوبل شوي دي.
طالب سرچینو ویلي، دغه ترافیکي پېښې لومړۍ یې د هلمند په واشېر ولسوالۍ کې د کندهار- هرات پر لویه لار ، دوهمه یې د کندز په دشت ارچي ولسوالۍ کې د کرولا چپه کېدلو، درېیمه یې په بلخ کې د قوش تېپې- حیرتان پر لویه لاره او څلورمه یې د بدخشان ولایت په اشکاشم ولسوالۍ کې له سړک څخه د یوه موټر اوښتو له امله رامنځ ته شوې ده.
سرچینې وايي چې ژوبل کسان د درملنې له پاره روغتونونو ته لېږدول شوي دي.
د دې پېښو د رامنځ ته کېدو لاملونه د موټر چلوونکو بې احتیاطي یاده شوې ده.
دغه پېښې داسې مهال رامنځته شوي، چې تېره پنج شنبه د طالبانو مشرتابه په کندهار کې د دیني عالمانو غونډې ته وویل چې، د ترافیکي پېښو په اړه عامه پوهاوی وکړي؛ څو خلک هم ځان او د نورو ژوند له تباه کېدو وژغوري.