تاند『چهارشنبه د زمري ـ اسد ۸مه』‏د طالبانو د کډوالو وزارت د د دوی تر واک لاندې رسنیو مرکز کې د یو کلنې لاسته راوړنې د تشریح په پروګرام کې وویل، چې د تېرو درېیو میاشتو په لړ کې له ایرانه په جبري ډول څه کم ۲ میلیونه افغانان را ایستل شوي دي.

د دغه وزارت مسلکي مرستیال، عبدالرحمن راشد پر کوربه هېوادونو نیوکه وکړه چې د کډوالو د کډوالو د را ایستلو دغه ناورین د بشري اصولو او انساني او اسلامي ارزښتونو خلاف دی.

د طالبانو د کډوالو او راستنېدونکو چارو وزارت د طبیعي او غیرطبیعي لاملونو له امله د بې ځایه شویو شمېر بیا په تېر کال کې څه باندې ۱۳ زره یاد کړ چې د ټولټال بې ځایه شویو شمېر ورسره ۲ نیم میلیونو ته رسیږي.

راشد زیاته کړه، چې اوس مهال د نړۍ په بېلابېلو هېوادونو کې شاوخوا ۶ میلیونه افغانان کډوال دي.

له ایرانه د افغان کډوالو د جبري اخراج د پروسې پر دوام تازه ایراني چارواکي وایي، د دغه هېواد تولیدي فابریکې او ښاري بنسټونه د کارګرانو له سخت کمښت سره مخ دي.

د تهران د ښاري شورا غړی ناصر اماني ویلي، چې د افغان کډوالو له ایستلو وروسته د ښاروالۍ د کارګرانو شمېر شاوخوا ۸۰سلنه راکم شوی دی.

د نوموړي په وینا، دغه وضعیت د ښاروالۍ لپاره ستره ستونزه رامنځته کړې ده.

اماني د بېلګې په ډول ویلي، چې د تهران په یوه مرکزي سیمه کې د کارګرو شمېر له ۱۳۵کسانو اوس ۳۵ته راښکته شوی، چې له دې ډلې یوازې پنځه تنه ایرانیان او پاتې نور بهرنيان او ډېری یې افغان کډوال دي.